भारी सवारी हेटौँडा प्रवेशमा समय निर्धारण

२१ माघ, हेटौँडा । हेटौंडा बजारमा भारी सवारी प्रवेशका लागि निश्चित समय निर्धारण गरिएको छ । मकवानपुर उद्योग वाणिज्य संघमा सवारी व्यवस्थापन समितिका संयोजक काव्यमणि अधिकारीको अध्यक्षतामा भएको छलफलमा यस्तो निर्णय गरेको हो ।
हेटौंडाको कान्तिराजपथतर्फ बुद्ध चौक देखि नगरपालिका मोडसम्म स्कूल रोड तर्फ सीमा चौक देखि भुटनदेवी स्कूल मोड सम्म, पारिजात पथ तर्फ भुटनदेवी स्कूल मोड देखि शितल महल चोकसम्मको क्षेत्र भित्र भारी सवारी साधन प्रवेशका लागि समय निर्धारण गरिएको छ । 
बिहान ९ देखि ११ र दिउँसो ३ देखि साँझ ५ः३० सम्म ९ टन क्षमता भन्दा कम क्षमताका सवारीले सामान लोड अनलोड लगायतका कार्यहरु गर्न नपाउने भएका छन् । ९ टन भन्दा बढी क्षमता भएका सवारी विहान ९ बजे अघि नै बजार क्षेत्रबाट बाहिरिनुपर्ने छ भने साँझ ५ः३० पछि मात्र प्रवेश गर्न पाउनेछन् ।
छलफलमा संघका अध्यक्ष कृष्ण कटुवाल, महासचिव प्रमोदसिंह रानाभाट, जिल्ला ट्राफिक प्रहरी कार्यालयका प्रहरी नायब निरीक्षक सन्तोष पोखरेल, नारायणी यातायात व्यवसायी संघका सचिव गुणराज घिमिरे, संघका कार्यसमिति सदस्यहरुको उपस्थिति रहेको थियो । स निर्णय माघ २२ गते बाट नै लागू हुने जनाईएको छ ।