मकवानपुर प्रहरीद्वारा एलिसा न्यौपाने हत्याका आरोपी पैठान पक्राउ

न्यौपाने हत्या आरोपी पैठान

१७ भदौ, हेटौँडा। भदौ १० गते हेटौंडा १० टिसिएनरोडको रहेको रत्ना होटलमा मृत अवस्थामा फेला परेकी हेटौंडा ११ की एलिसा भन्ने अलिसा न्यौपानेको हत्याको मुख्य आरोपीलाई मकवानपुर प्रहरीले पक्राउ गरेको छ।

हत्यामा आरोपी हेटौंडा ४ कमलडाँडाका समिर खान भन्ने चाँद खाँ पैठानलाई वडा प्रहरी कार्यालय हेटौंडाको टोलीले हेटौंडा ५ लट्टीनाथ एरियाबाट पक्राउ गरेको हो। खानलाई बिशेष सूचनाको आधारमा लुकेर बसेको अवस्थामा सोमबार साँझ नियन्त्रणमा लिइ़एको हो। 

भदौ ९ गते खानसंगै बा ६४ प १३५ नम्बरको स्कुटर चढेर बास बस्न उक्त होटल पुगेकी न्यौपाने भोलिपल्ट बिहान मृत अवस्थामा फेला परेकी थिइन्। होटलका सञ्चालकले कोठा नम्बर २०५ मा बसेकी युवती बिहान अबेर नउठेपछि जिल्ला प्रहरी कार्यालय मकवानपुरलाई टोलिफोन गरेका थिए। टोलिफोनबाट खबर पाएलगत्तै जिल्ला प्रहरी कार्यालय मकवानपुरका प्रहरी उपरीक्षक सिताराम रिजाल र प्रहरी नायब उपरीक्षक लक्ष्मी  भण्डारी नेतृत्वको टोली घटनास्थल पुगेर जनप्रतिनिधिको रोहोबरमा कोठा फोडेर भित्र प्रवेश गरेको थियो। प्रहरीले न्यौपानेको शव रगतले लतपत्तिएको अवस्थामा फेला पारेको थियो।घटना स्थलबाट शुरु भएको मकवानपुर प्रहरीको अनुसन्धानले अन्नत सफल भएको छ। मकवानपुर प्रहरी प्रवक्ता प्रहरी नायब उपरीक्षक लक्ष्मी भण्डारीले  घटनामा संलग्न रहेको आरोपमा निजको आमा ५५ वर्षीय सैरुन खान, निजको श्रीमती २६ वर्षीय रविना खातुन, ससुरा विरगंज ३० का ५६ वर्षीय लालबाबु खाँ पैठान, पैठानका छोरा ३० वर्षीय फैयाज अहमद गरी ४ जनालाई पक्राउ गरेर अनुसन्धान सुरु गरेकोमा सोमबार साँझ घटनाकोमा संलग्न मुख्य व्यक्त पक्राउ गर्न सफल भएको बताएका छन्। 

"हामिले घटनास्थलको सिसिटिभि फुटेज, घटनाको प्रयोग भएको स्कुटरको आधारमा, संलग्न अन्य व्यक्ति र सूक्ष्म अनुसन्धानबाट घटनाका मुख्य  आरोपी पक्राउ गर्न सफल भएका हौ" - डिएसपी भण्डारीले भने।