मनहरी गाउँपालिकाका अध्यक्ष कालाखेतीले बनाइदिए एकल महिलालाई घर

१ असोज, हेटौंडा। मकवानपुरको मनहरी गाउँपालिका अध्यक्षले आफुले पाउने पारिश्रमिकबाट एकल महिलालाई घर बनाइदिएका छन्। पालिका रन्जन कालाखेतीले पारिश्रमिक तथा सेवा सुविधावापत् प्राप्त रकम खर्चेर मनहरी ५ मा बस्दै आएकी एकल महिला सोनी राईलाई पक्की घर बनाइदिएका हुन् । 

मनहरी-५ बसन्तपुरमा लामो समयदेखि घर बिहिन बस्दै आएकी  राईलाई कालाखेतीले कोषबाट प्राप्त २ लाख १५ हजार रुपैयाँ खर्चेर घर बनाइदिएका हुन्।उक्त घरको साँचो कालाखेतीले मंगलबार राईलाई हस्तान्तरण गरेका  छन् 

हस्तान्तरण कार्यक्रममा बोल्दै कालाखेतीले कच्ची घरमा बस्दै आएकी उनको बारेमा  स्थानीय शान्ता अधिकारी र अन्य गाउँलेहरूले जानकारी गराएपछि आ़फुले सहयोग गर्ने प्रतिबद्धता व्यक्त गरेको बताए।

"मेरो पालिकामा रहेका नागरिकलाई सहयोग गर्नु मेरो कर्तव्य हो, आज प्रतिवद्धता पुरा भएको छ "- अध्यक्ष कालाखेतीले भने। सोनीको परिवारमा उनीबाहेक कोही छैनन्। ८ वर्ष अगाडि श्रीमान् नरबहादुरको काठ काट्न जाँदा लडेर मृत्यु भएपश्चात् उनी लामो समयदेखि वसन्तपुरमा सानो छाप्रो बनाएर बस्दै आएकी थिइन्। नयाँ घर पाएसंग सोनीले गाउँपालिका अध्यक्षलाई धन्यवाद ज्ञापन गरेकी थिइन्।