आज राष्ट्रिय सभा निर्वाचनः ३२ सिटका लागी ५२ जना भिड्दै 

२४ माघ, हेटौँडा । राष्ट्रियसभा निर्वाचनको सम्पूर्ण तयारी पूरा भएको छ । निर्वाचन आज हुँदै छ । निर्वाचन आयोगले मंगलबार काठमाडौंमा पत्रकार सम्मेलन गरी राष्ट्रिय सभा निर्वाचनको सम्पूर्ण तयारी पूरा भएको जानकारी गराएको हो । आज हुने निर्वाचन विहान १० बजेदेखि अपरान्ह ३ बजेसम्म हुने आयोगले जनाएको छ । 
मतदानका लागि सबै प्रदेशमा स्थापना गरिएको निर्वाचन अधिकृतको कार्यालयले मतदानका लागि गर्नुपर्ने सबै तयारी पूरा गरेको जानकारी आयोगलाई प्राप्त भएको प्रमुख निर्वाचन आयुक्त डा. अयोधिप्रसाद यादवले जानकारी दिए । 
राष्ट्रिय सभाको निर्वाचनमा विगतका निर्वाचनमा जस्तो स्वस्तिक चिन्ह प्रयोग गर्नु नपर्ने व्यवस्था पनि मिलाएको छ । प्रमुख निर्वाचन आयुक्त यादवले मतदानका लागि प्रदेशसभाका सदस्यले हरियो रङको मतपत्रबाट र स्थानीय तहका मतदाताले रातो रङको मतपत्रमा मत संकेत गर्नु पर्ने जानकारी दिए । 
कूल ५६ जना सदस्यका लागि हुने मतदानमा २४ जना निर्विरोध निर्वाचित भईसकेकाले आज हुने निर्वाचनले ३२ जना सदस्य निर्वाचित गर्ने छ जस्का लागि ५२ जना उम्मेदवारी परेको आयोगले जानकारी दिएको छ ।
प्रत्येक प्रदेशमा कम्तीमा तीन महिला, अन्यतर्फ तीनजना, एक दलित र एक अपांगता÷अल्पसंख्यकसहित आठजना निर्वाचित हुने व्यवस्था छ । ५९ सदस्यीय राष्ट्रिय सभामा ५६ सदस्य निर्वाचनको माध्यमबाट र बाँकी तीन सदस्य राष्ट्रपतिले मनोनीत गर्ने संवैधानिक प्रावधान छ । 

प्रदेश २ बाट आठजना राष्ट्रिय सभा सदस्य निर्विरोध निर्वा्चित भइसकेकाले अन्य ६ प्रदेशमा मात्रै निर्वाचन हुने आयोगले जनाएको छ । आयोगले प्रदेश २ बाहेकका प्रदेशमा उच्च अदालत रहेका ठाउँमा मुख्य निर्वाचन अधिकृतको कार्यालय स्थापना गरेको छ । प्रदेश १ को विराटनगर, ३ को ललितपुरको पाटन, ४ को पोखरा, ५ को दाङ, ६ को सुर्खेत र ७ को डोटीमा निर्वाचन अधिकृतको कार्यालय स्थापना गरिएको छ ।
आज निर्वाचनपछि तत्काल मतगणना सुरु गरिने र ढिलोमा २५ गतेसम्म सबै स्थानको मतपरिणाम सार्वजनिक गरिसक्ने तयारी आयोगले गरेको जानकारी दिइएको छ ।