मकवानपुरका एसपी खड्काको टोलीले समात्यो ८ किलो सुन

१९ असोज, हेटौंडा। मकवानपुर सरुवा भई आएको एक साता नबित्दै प्रहरी उपरीक्षक विश्वराज खड्का नेतृत्वको मकवानपुर प्रहरीले शनिबार बिहान हेटौंडाबाट ठुलो परिणाममा सुन बरामद गरेको छ । एसपी खड्काको नेतृत्वमा गएको प्रहरी टोलीले ८ किलो २४३ ग्राम ९७० मिलिग्राम सुनसहित दुई जना भारतीय नागरिकलाई पक्राउ गरेको हो। शनिबार बिहान ३ बजेको समयमा विशेष सूचनाको आधारमा  हेटौँडा-१५ रातोमाटे चेकपोष्ट स्थित पूर्व पश्चिम सडक खण्डमा पथलैयाबाट हेटौँडातर्फ आउँदै गरेको बागमती प्रदेश ०२–०४७ प ७५०३ नम्बरको स्कुटरलाई रोकी चेकजाँच गर्ने क्रममा उक्त सुन सहित भारत महाराष्ट्र सांगली जिल्ला दिघंची थाना पुजारवाडी बस्ने वर्ष २५ को अभिषेक अजिनाथ कुटी र सोही स्थान बस्ने वर्ष २७ को राहुल भिट्टिहाललाई पक्राउ गरिएको हो। 

शनिबार जिप्रका मकवानपुर परिसरमा पत्रकार सम्मेलन गरी बरामद सुनको मूल्य ११ करोड ४३ लाख ५७ हजार ८७८ रुपैयाँ ६५० रुपैयाँ बराबरको रहेको एसपी खड्काले जानकारी दिएका छन्। 

पत्रकार सम्मेलनमा प्रहरीको प्रारम्भिक अनुसन्धान अनुसार पक्राउ परेका दुवै जनाले यस अघि एक पटक नेपाल आएर सुन कारोबार गरेको  बुझिएको छ । पक्राउ परेका माथि आवश्यक अनुसन्धान भइरहेको जनाइएको छ।