कांग्रेसद्वारा ५० लाख रूपैयाँ राहत सरकारलाई हस्तान्तरण

२१ असोज, हेटौंडा । नेपाली कांग्रेसले बाढी पहिरोसहितका विपदमा रहेका नागरिकका लागि ५० लाख राहत सरकारलाई हस्तान्तरण गरेको छ ।
 पार्टी सभापति शेरबहादुर देउवाको नेतृत्वमा प्रधानमन्त्रीलाई भेट्दै कांग्रेसले राहत हस्तान्तरण गरेको हो । 
कांग्रेसले सरकारलाई उद्धार, राहत, पुनःस्थापना र पुनर्निर्माणका लागि तात्कालिक, अल्पकालीन र दीर्घकालीन गरी ३४ बुँदे सुझावसमेत दिएको छ । 
भारी वर्षाका कारण जनधनको ठूलो क्षतिले सिंगो देश मर्माहत भएको उल्लेख गर्दै कांग्रेसले ध्यानाकर्षण प्रस्तावमा भनेको छ, 'तीनै तहको सरकार, राजनीतिक दलहरू, निजी क्षेत्र, सामाजिक संघ–संस्थाहरू समेत संयोजन गरी ‘विपदमा सम्पूर्ण एकताको नेपाली संस्कार’ प्रदर्शित गर्दै उद्धार, राहत, पुनस्थापना र पुनर्निर्माणको दायित्व व्यवस्थित रूपले सम्पादन गर्न अत्यावश्यक छ ।'
विपद व्यवस्थापनमा संसदमा प्रतिनिधित्व गर्ने सबै दलको ऐक्यबद्धतासहित साझा कार्ययोजना बनाएर कार्यान्वयन गर्नुपर्ने कांग्रेसको तात्कालिक सुझाव छ । तीनै तहका सरकारको साझा स्वामित्व हुनेगरी कार्य योजना बनाउन सझुाव दिएको कांग्रेसले स्वदेश र विदेशमा रहेका संघसंस्थालाई पनि उद्धार राहत र पुनस्र्थापनामा परिचालन गर्न आग्रह गरेको छ । 
राहत, पुनःस्थापना र पुनर्निर्माणमा निजी क्षेत्रको साथ लिन आग्रह गर्दै तत्काल राहत पुर्याउन संयन्त्र परिचालनमा लाग्न आग्रह गरेको छ । कांग्रेसले १५ बुँदे तात्कालिक, ७ बुँदे मध्यकालीन र १२ बुँदे दीर्घकालीन कार्यक्रमका लागि सुझावसहित राहत हस्तान्तरण गरेको छ ।