सभामुख श्रेष्ठद्वारा सपथग्रहण

रुपेश दुलाल
२७ माघ, हेटौँडा । ३ नम्बर प्रदेशका नवनियुक्त सभामुख सानुकुमार श्रेष्ठले शनिबार अपरान्ह सपथग्रहण गरेका छन् । ३ नम्बर प्रदेशका प्रदेशप्रमुख अनुराधा कोइरालाले प्रदेश कार्यालयमा भएको विशेष कार्यक्रममा सभामुख श्रेष्ठलाई सपथग्रहण गराएकी हुन् । 
सपथग्रहण कार्यक्रममा अहिले सभाध्यक्षता गरिरहनु भएका ज्येष्ठ सदस्य एवं एमाले संसदीय दलका नेता डोरमणी पौडेल, प्रदेशसभा सदस्य, प्रतिनिधिसभा सदस्य, स्थानीय तहका प्रमुख, उपप्रमुख, प्रदेश सचिवालयका कर्मचारी, प्रदेश कार्यालय कर्मचारी र सुरक्षा निकायका प्रमुखहरुको सहभागिता रहेको थियो । सपथग्रहणपछि प्रतिक्रिया दिंदै सभामुख श्रेष्ठले आफुलाई सर्वसम्म सभामुख चयन गर्न सहयोग गर्ने सबै दललाई धन्यवाद दिंदै प्रदेशको समृद्धिका लागि सबै दललाई मिलाएर अघि बढ्न समन्वयकारी भुमिका निर्वाह गर्ने बताए ।
यसअघि दिउसो ३ बजे बसेको प्रदेशसभा बैठकले श्रेष्ठलाई सर्वसम्मत सभामुख चयन गरेको थियो । सभामुखका लागि प्रस्ताव दर्ता गर्ने समय अवधिसम्म श्रेष्ठको मात्रै उम्मेदवारी परेपछि श्रेष्ठ सर्वसम्मत भएका हुन् । उनको प्रस्तावकमा माओवादी केन्द्र संसदीय दलका नेता शालिकराम जमरकट्टेल र समर्थकमा एमालेका प्रदेशसभा सदस्य रामेश्वर फुँयाल रहेका थिए । ५८ बर्षिय श्रेष्ठ काठमाण्डौं क्षेत्र नम्बर १ (क) का निर्वाचित प्रदेशसभा सदस्य हुन् ।
आइतबार दिउँसो २ बजे उपसभामुखको चयन हुने कार्यतालिका प्रदेशसभा सचिवालयको छ । उपसभामुखमा बामगठबन्धनको समर्थनमा माओवादी केन्द्रकी प्रदेशसभा सदस्य राधिका तामाङले उम्मेदवारी दिने जनाईएको छ । कांग्रेसले आफ्नो दलबाट वा तामाङ बाहेक अर्को उम्मेदवारलाई मतदान गर्न सक्ने कांग्रेस ३ नम्बर प्रदेश संसदीय दलका नेता ईन्द्रबहादुर बानियाँले संचारकर्मीहरुसंगको कुराकानीमा संकेत गरे ।