मकवानपुरगढी-२ मा वन डढेलो नियन्त्रणका लागि सचेतनामुलक अभियान

३ फागुन, हेटौंडा । मकवानपुरगढी-२ शिखरकटेरीमा वन डढेलो नियन्त्रणका लागि सचेतनामुलक अभियान संचालन गरिएको छ ।
विश्व सालक दिवसको अवसरमा चुच्चेखोला सामुदायिक वन उपभोक्ता समूह हेटौंडा-६, बाघभैरव सामुदायिक वन समूह मकवानपुरगढी-२ र अशोक सामुदायिक वन उपभोक्ता समूह हेटौंडा-१७ को संयुक्त आयोजनामा सचेतनामुलक अभियान भएको हो ।
अभियान अन्तरगत शिखरकटेरीदेखि शुरू भएको सचेतनामुलक र्याली गैरीभञ्ज्याङ पुन: शिखरकटेरीमा फर्किएर अन्तरक्रिया गरिएको थियो । अन्तरक्रियामा मकवानपुरगढी सव डिभिजन फरेष्टर देवेन्द्र सञ्जेल र हर्नामाडि सव डिभिजन सहायक वन अधिकृत मदन घिमिरेले सहजिकरण गरेका थिए । त्यस्तै, वन विज्ञान अध्ययन संस्थान हेटौंडा र कृषि वन विश्वविद्यालय हेटौंडाका विद्यार्थीले सालकबारे जानकारी दिएका थिए ।
मकवानपुरगढी-२ का वडा अध्यक्ष बखानसिंह पाख्रिनको प्रमुख आतिथ्यता एवं चुच्चेखोला सामुदायिक वन उपभोक्ता समूहका अध्यक्ष लक्ष्मण कटुवालको सभाध्यक्षतामा कार्यक्रम भएको थियो ।
कार्यक्रममा मकवानपुरगढी-२ का वडा सदस्य रामप्रसाद चौरेल, हर्नामाडि सव डिभिजन सहायक वन अधिकृत मदन घिमिरे, इप्रका मकवानपुरगढी, प्रहरी निरीक्षक बिरेन्द्र रायमाझी, सामुदायिक वन उपभोक्ता महासंघ हेटौंडा नगर सचिवालय सदस्य दुर्गा महत, पत्रकार रूपेश दुलाल, बाघभैरव सामुदायिक वन समूहका अध्यक्ष गम्भीरराज न्यौपाने, अशोक सामुदायिक वन समूहका अध्यक्ष रमेशकुमार राई, चुच्चेखोला सामुदायिक वन उपभोक्ता सामूहका कार्यालय सचिव केदार गौतम लगायतले मन्तव्य व्यक्त गरेका थिए ।
कार्यक्रममा सामुदायिक वन उपभोक्ता महासंघ हेटौंडा नगर सचिवालय सदस्य नारायण ढकाल,  वन रक्षक किरणकुमार क्षेत्री लगायतको सहभागिता रहेको थियो ।
सामुदायिक वन समूहका उपभोक्ता, टोल विकास संस्थाका प्रतिनिधि, सुरक्षाकर्मी लगायतको उपस्थिति रहेको थियो । प्रत्येक बर्षको फेब्रुअरीको तेस्रो शनिबार मनाइने सालक दिवसको यस वर्षको नारा 'सालक संरक्षणको लागि युवा विरासत' रहेको छ ।