कैलाश अध्यक्ष कप फुटबल :वडा नम्बर ८ र १० बिच उपाधि भिडन्त

१६ फागुन, हेटौंडा। मकवानपुरको कैलाश गाउँपालिकामा जारी पालिका स्तरीय अन्तर वडा तेस्रो अध्यक्ष कप फुटबल प्रतियोगिताको उपाधिका लागि वडा नम्बर १० र ८ बिच भिडन्त हुने भएको छ ।
शुक्रबार भएको पहिलो सेमीफाइनल खेलमा वडा १० ले ७ लाई २-० गोल अन्तरले पराजित गर्दै  फाइनल भिडन्त पक्का गरेको हो । १० नम्बरका लागि अनिल सिंतान र सागर बलले एक/एक गोल गरेका थिए । खेलको म्यान अफ द म्याच वडा १० का खेलाडी साजन जिम्बा घोषित भए । आजै भएको दोस्रो सेमीफाइनल खेलमा वडा नम्बर ८ पनि फाइनलमा प्रवेश गरेको छ ।

वडा ८ र ५ बिचको भएको प्रतिस्पर्धामा वडा नम्बर ८ ले वडा नम्बर ५ लाई १-० गोल अन्तरले पराजित गर्दै फाइनल प्रवेश गरेको हो । वडा नम्बर ८ का  बेबदुध नेगीले  निर्णायक गोल गरेका थिए । नेगीनै खेलको म्यान अफ द म्याच भएको खेलकुद विकास समितिका संयोजक मोहन वाइवाले बताएका छन् ।

कैलाश ९ नामटार खैल मैदानमा शनिबार हुने फाइनल खेल वडा १० र ८ बीच हुनेछ । वडा १० दोस्रो अध्यक्ष कपको विजेता टिम समेत हो । गाउँपालिकाको आयोजना तथा कैलाश गाउँपालिका खेलकुद विकास समितिको व्यवस्थापनमा प्रतियोगिता भएको हो । विजेता टिमले एक लाख नगद सहित ट्रफि, मेडल र प्रमाणपत्र प्राप्त गर्नेछन् भने उपविजेताले ६० हजार नगद सहित ट्रफि, मेडल र प्रमाणपत्र प्राप्त गर्नेछन् ।