कैलाशमा ईसिडी शिक्षकलाई दिइएको तालिम सम्पन्न

१७ फागुन, हेटौंडा। मकवानपुरको कैलाश गाउँपालिकाका प्रारम्भिक बाल विकास शिक्षकहरुका लागि दिइएको चार दिने मन्टेश्वरी तालिम शुक्रबार सम्पन्न भएको छ । मंगलबारबाट सुरु भएको तालिम गाउँपालिकाको शिक्षा, युवा तथा खेलकुद शाखाको आयोजनामा भएको हो । तालिम कैलाश वडा नम्बर ९ मा अवस्थित कालिका माध्यामिक विद्यालयमा तालिम सञ्चालन भएको थियो । वडा नम्बर ९ का वडाध्यक्ष भूवन सिं घलानको सभाध्यक्षता तथा गाउँपालिका उपाध्यक्ष बालकुमार मल्ल ठकुरीको प्रमुख आतिथ्यतामा तालिमको समापन गरिएको थियो । 

कार्यक्रममा सहभागीहरुलाई प्रमाणपत्र प्रदान गरिएको थियो । उपाध्यक्ष मल्लले शिक्षा क्षेत्रमा हामी अलि पछाडि परेको  अवस्थामा सिकाई र क्षमता वृद्धिको लागि पालिकाले तालिमको आयोजना गरिएको बताए । सिकेको सीपलाई व्यवहारमा ल्याउन उनले सबै शिक्षकहरुलाई आग्रह समेत गरेका थिए । 

कार्यक्रममा शिक्षा शाखा प्रमुख समीर जोशी, प्राविधिक सहायक दीपेन्द्र अधिकारीको आतिथ्यता रहेको थियो । तालिममा ४० वटा बाल विकास केन्द्रका शिक्षकहरुको सहभागिता रहेको छ । चार दिने तालिमलाई प्रशिक्षकद्धय रजनी श्रेष्ठ र रश्मी श्रेष्ठले सहजीकरण गर्ने थिए । विद्यालयकै आधारशीला बालविकास केन्द्र हो, बालमैत्री र सिकाईमैत्री वातावरणमा बालबालिकालाई अध्यापन गराउनु पर्ने शिक्षकहरुको दायित्व रहेको शाखा प्रमुख जोशीले बताए । शिक्षकको सिकाई र क्षमता वृद्धिको लागि पालिकाले तालिमको आयोजना गरिएको उनको भनाई रहेको थियो ।