कैलाशमा सीप परीक्षण सम्बन्धी अन्तरक्रिया

२२ चैत, हेटौंडा । मकवानपुरको कैलाश गाउँपालिकामा राष्ट्रिय व्यवसायिक योग्यता प्रणाली कार्यान्वयन र सीप परीक्षण सम्बन्धी छलफल तथा अन्तरक्रिया भएको छ । गाउँपालिका अध्यक्ष लोकबहादुर मुक्तानको अध्यक्षतामा उक्त छलफल भएको हो । 
सीप जानेका तर प्रमाणपत्र नलिएका दक्ष जनशक्तिहरुको पहिचान र उनीहरुको सीपलाई बजारीकरणको लागि कार्यक्रम गरिएको थियो । 
कार्यक्रममा नेपाल व्यवसायिक योग्यता प्रणाली परियोजनाका प्रदेश प्रबन्धक सुकबहादुर चौधरीले  सीप परीक्षण तथा प्रमाणीकरणमा र हाम्रो भूमिका विषयक कार्यपत्र प्रस्तुत गरेका थिए । उनले नेपालमा प्राविधिक शिक्षा, तालिम दिने संस्था र कार्यक्रमको वर्तमान  अवस्थाबारे समेत जानकारी दिएका थिए । नेपालमा वार्षिक एक लाख १४ हजार दक्ष जनशक्ति उत्पादन हुने गरेको बताउँदै गाउँपालिका भित्र रहेका सीपमूलक काम गरिरहेका जनशक्तिको सीप परीक्षणको प्रक्रिया र तालिमका साथै श्रम बजारबारे बताएका थिए । 
अहिले हामीले वार्षिक तीन पटक सीप परीक्षण गर्दछौं, चौधरीले भने । हाल सम्म सरदर साढे सात लाखले आवेदन दिए पनि सात लाखको सहभागिता हुने गरेको छ जसमा  पाँच लाखले प्रमाणपत्र प्राप्त रहेको उनले बताए । 'प्रमाणपत्र प्राप्त गर्ने मध्ये ४६.८७ प्रतिशत महिलाहरु रहेका छन्', उनले भने ।
उनले सीप परीक्षणमा चुनौति समेत रहेको बताए ।  जनशक्तिलाई  कसरी प्रमाणित  गर्ने ? प्राविविधक शिक्षा कसरी परिणाममुखी बनाउने ? यूवाको योग्यतालाई कसरी सीपलाई जोड्ने भन्ने विषय रहेको बताए । प्राविधिक शिक्षा र साधारण शिक्षा बीचको तालमेल मिलेको छैन, सीप छ तर प्रमाणपत्र छैन त्यसैले पनि समस्या रहेको चौधरीले बताए । 
कार्यक्रममा गाउँपालिका अध्यक्ष लोकबहादुर मुक्तानले  पालिकाभित्र रहेका सीप जानेका तर प्रमाणपत्र नलिएका जनशक्तिलाई सीप परीक्षणमा सहभागिता जनाउने प्रतिवद्धता व्यक्त गरेका छन् । आगामी दिनमा पनि यस कार्यलाई निरन्तरता दिनुका साथै रोजगार सिर्जना  हुनाले सीपलाई परीक्षण गरिनुपर्नेमा उनको जोड रहेको थियो ।  
कार्यक्रममा  गाउँपालिकाका उपाध्यक्ष बालकुमार मल्ल, बागमती प्रदेश सामाजिक विकास मन्त्रालयका लेखा अधिकृत ईन्द्रप्रसाद अधिकारी, प्रमुख प्रशासकीय अधिकृत अमुल श्रेष्ठ, गाउँपालिकाका विभिन्न वडाका वडाध्यक्ष, कार्यपालिका सदस्य, वडा सचिव, शाखाका प्रमुखहरुको सहभागिता रहेको थियो ।