पालुङ बस दुर्घटना अपडेट : थप एकजनाको मृत्यु, मृतकको संख्या ३ पुग्यो

१३ जेठ, हेटौंडा। सोमबार अपरान्ह त्रिभुवन राजपथ अन्तर्गत मकवानपुरको थाहानगर ३ पालुङमा बसको ठक्करबाट गम्भीर घाइते २ मध्ये थप एकजनाको मृत्यु भएको छ। योसंग सो घटनामा ज्यान गुमाउने संख्या ३ पुगेको छ।

सोमबार अपरान्ह बज्रबाराहीको गोपाली गाँउबाट थानाबजार तर्फ जादै गरेको बा ३ ख ५९९० नम्बरको बस ब्रेक फेल भई  सडकमा हिडिरहेका ६ जनालाई ठक्कर दिएको थियो ।

ठक्करबाट स्थानीय झम्केश्वरी मा विका शिक्षक लोकेन्द्रकुमार ठाकुर र लेखापढी गर्ने कृष्ण बलामीको ज्यान गएको थियो । ठाकुर र बलामिको प्राथमिक स्वास्थ्य केन्द्र पालुङमा उपचारको क्रममा मृत्यु भएको थियो। त्यसैगरी झम्केश्वरी मा वि कै शिक्षक रघुनन्दन यादव र कमलेश शाह गम्भीर घाइते भएका थिए। गम्भीर घाइते यादवको उपचारको क्रममा ट्रमा सेन्टर काठमाडौंमा ज्यान गएको मकवानपुर प्रहरी प्रवक्ता प्रहरी नायब उपरीक्षक श्यामु अर्यालले जनाएका छन् । उक्त घटनामा बाराको जितपुर सिमरा घर भएका अन्दाजी ३२ वर्षीय छेयाङ दोर्ज लामा र बाराको कोल्वी घर भइ झम्केस्वरी मा वि मै पढाउने शिक्षक अन्दाजी ३० वर्षीय रामगुलाम चौधरी घाइते भएका छन्। घाइते दुवैको पालुङमा उपचार भइरहेको छ। ठक्कर दिने बस तथा चालकलाई प्रहरीले नियन्त्रणमा लिइसकेको छ। बसले थाहानगरका उप प्रमुख भरत गोपालीको घरमा समेत क्षति पुगेको छ। बस पैदलयात्रीलाई ठक्कर दिएर घरको पर्खालमा ठोक्किन पुगेको थियो।