को को रहलान् मूख्यमन्त्री पौडेलको सचिवालयमा ?

१७ फागुन, हेटौँडा । मूख्यमन्त्री डोरमणी पौडेलको सचिवालयमा को को रहलान् भन्ने चासो अहिले हेटौँडामा चर्चाको विषय बनेको छ ।

बलियो सचिवालयले मात्रै मूख्यमन्त्रीको कार्यकाल सफल हुने भएकाले पनि यसबारे धेरैको चासो बढेको हो । तर पनि अहिलेसम्म पौडेलले सचिवालयमा कसैलाई पनि औपचारिक रुपमा नियुक्त गरेका छैनन् । मूख्यमन्त्री, मन्त्री, प्रदेशसभा सदस्य, प्रमुख प्रतिपक्ष दलका नेता लगायतले पाउने सेवा सुविधाबारे कानून नबन्दा पौडेललाई सचिवालय गठनमा समस्या परेको छ । सेवा सुविधासम्बन्धी कानून मन्त्रालयले पाईपलाईनमा राखेकाले अब छिट्टै यो संसदमा पुग्ने देखिन्छ ।

तर पनि पौडेलको सचिवालयमा रहन अहिलेदेखि नै दौडधुप, भनसुन शुरु भईसकेको एमाले स्रोतको भनाई छ । ‘सेवा सुविधासहितको पद भएकाले दौडधुप हुन स्वभाविक छ ।’–ति नेताले भने–‘तर कस्तो मान्छेलाई सचिवालयमा राख्ने भन्ने मूख्यमन्त्री र पार्टीले निर्णय गर्ने विषय हो ।’ अहिले पौडेलको सहयोगीको रुपमा अनुप पौडेलले काम गरिरहेका छन् । कानून बनेपछि उनी स्वकीय सचिव बन्ने निश्चित छ ।

मूख्यमन्त्रीले राजनैतिक सल्लाहकार पनि राख्न सक्ने भएकाले यसमा धेरैको चासो छ । तर एमाले स्रोतका अनुसार एमाले नेता श्रीधर पोखरेल राजनैतिक सल्लाहकार बन्ने सम्भावना बलियो छ । अर्का नेता एकलाल श्रेष्ठको नाम पनि चर्चामा रहेपनि उनले आफुले यसबारे कुनै चासो नराखेको बताए । राजनीतिमा लामो अनुभव, हेटौंडा सिमेन्ट उद्योगको अध्यक्ष पनि भईसकेको र अहिलेको निर्वाचनमा एमालेलाई अहिलेको सफलता दिन उनको भूमिका महत्वपूर्ण रहेकोले पोखरेलको सम्भावना बलियो रहेको एमालेवृत्तमा चर्चा छ ।

त्यसैगरी, अहिले प्रेस सल्लाहकार बन्न पनि एमाले निकट पत्रकारहरुमा दौडधुप छ । एमाले पत्रकारमध्ये धर्मेन्द्र दाहाल, प्रकाश दाहाल, रामकुमार एलनको नाम चर्चामा छ । तर स्रोतका अनुसार धर्मेन्द्रको सम्भावना बलियो देखिन्छ । प्रेस चौतारीको केन्द्रबाट पनि यसमा चासो रहेकाले अन्तिम समयसम्म के हुन्छ अहिले नै भन्न नसकिने एमाले निकट एक पत्रकारको भनाई छ । सचिवालयमा एकजना महिला नेतृको पनि चर्चा छ ।

राजनीतिमा नदेखिएका तर आफ्नो क्षेत्रमा दक्षता हासिल गरेका केही गैरराजनीतिक अनुहार पनि पछिल्लो समय सचिवालयमा रहन दौडधुपमा रहेका छन् । एमाले जिल्ला सचिव एवं प्रवक्ता एकलाल श्रेष्ठले भने पार्टीमा मूख्यमन्त्रीको सचिवालयबारे कुनै छलफल नभएको बताए । उनले यो मूख्यमन्त्रीको अधिकार भएकाले पार्टीसंग सल्लाह मागे मात्रै दिन सकिने बताए । चर्चामा रहेका नामबारे पनि कुनै जानकारी नभएको उनको भनाई थियो ।