जिल्ला युवा समितिको अन्तरक्रिया सम्पन्न

१९ फागुन, हेटौँडा । राष्ट्रिय युवा परिषद स्थापना दिवसको अवसरमा जिल्ला युवा समिति मकवानपुरले अन्तरक्रिया गरेको छ । समितिले युवाका मुद्धा तथा युवा लक्षित कार्यक्रम बारे मकवानपुरका संचारकर्मीहरुसंग अन्तरक्रिया गरेको हो ।

कार्यक्रममा बोल्दै समितिका अध्यक्ष सन्तोष चौलागाईले आफुहरुले करिव २ बर्षको छोटो अवधिमा समितिले गरेको कामबारे लक्षित बर्गसम्म बुझाउने काम गरेको बताए । उनले समिति सरकारी निकाय मातहतमा रहेको जानकारी दिंदै युवा उद्यमशिलता अभिबृद्धि, नेतृत्व विकास, सिप एवं क्षमता अभिबृद्धि, स्वरोजगार लगायतका क्षेत्रमा समितिले काम गरेको बताए । उनले कागजी प्रक्रियाको जटिलताले अझै पनि टाढाबाठाले मात्रै प्रक्रिया पुरा गरेर सरकारी निकायबाट पाईने सुविधा लिन सक्ने अवस्था रहेको भन्दै यस्तो अवस्थाको अन्त्य जरुरी रहेका बताए ।

कार्यक्रममा संचारकर्मी रुपेश दुलाल, सुरेश श्रेष्ठ, बालकृष्ण अधिकारी, कृष्ण सारु मगर लगायतले समितिले आगामी दिनमा गर्नुपर्ने कार्यहरुबारे सुझाव दिएका थिए । कार्यक्रममा समितिका कार्यालय प्रमुख शम्भुप्रसाद पौडेल, सदस्य रामकृष्ण थापा, नेपाल पत्रकार महासंघका अध्यक्ष हरि हुमागाई लगायतले मन्तव्य व्यक्त गरेका थिए ।

समितिले उद्यमशिलताका लागि सहकारीसंगको समन्वयमा समूह बनाई काम गर्ने युवाहरुलाई निर्व्याजी ऋण सहयोग गर्दै आएको छ ।