मकवानपुरका सिडिओ र एसपीविरुद्ध कालो व्यानर टाँगेर हेटौंडाका जनप्रतिनिधिको विरोध

जिप्रका परिसरमै कालो व्यानर टागेर हेटौंडाका जनप्रतिनिधिको विरोध

४ साउन, हेटौंडा । हेटौँडा उपमहानगरपालिकाका जनप्रतिनिधिहरू मकवानपुर जिल्ला प्रमुख जिल्ला अधिकारी स्किम श्रेष्ठ र प्रहरी प्रमुख प्रहरी उपरीक्षक विश्वराज खड्का विरुद्ध आन्दोलित बनेका छन्।

गत असार ४ गते कार्यालयमै काम गरिरहेको समयमा हेटौँडा उपमहानगरपालिकाका प्रवक्ता एवम् १ नम्बर वडा अध्यक्ष सविन न्यौपाने माथि भएको हातपात र आक्रमण भएको घटनामा संलग्नलाई पक्राउ नगरिनु र घटनामा उदासिनता देखाएको भन्दै हेटौंडाका जनप्रतिनिधि प्रजिअ र एसपी विरुद्ध आन्दोलीत बनेका हुन्। 
हेटौंडाका उपमेयर राजेश बानियाँको नेतृत्वमा आइतबार जिल्ला प्रशासन कार्यालय मकवानपुरको गोलघरमा  साङ्केतिक कार्यालय नै खडा गरेर  सुरक्षा प्रमुख विरुद्ध कालो व्यानरनै टाँगेर प्रदर्शन गरेका हुन् ।मध्य बजार क्षेत्रमा दिउँसै व्यवसायी कुटिँनु, वडाध्यक्ष माथि हातपात हुनु, दिउँसै नगरका घरमा चोरीका घटना बढ्दा समेत प्रहरी प्रशासनले प्रभावकारी कार्य गर्न नगरेकोले वाध्य भएर विरोधमा उत्रनुपरेको उपमेयर बानियाँले बताएका छन् ।

"म हेटौंडा नगरको न्यायिक समितिको संयोजक,जनप्रतिनिधी कुटिदा प्रशासन उदासिन रहन्छ, जनताको प्रतिनिधि आज न्याय माग्न यसरी विरोधमा उत्रनु पर्यो, यो विडम्बना हो, न्याय नपाउँदा विरोध गरिएको हो यो मेरो मात्र होइन जनतको अपेक्षा पनि हो"। - उपमेयर बानियाँले भने। 

यता मकवानपुरका प्रहरी प्रमुख एसपी विश्व खड्काले घटनाका दोषी कोही पनि उम्किन नसक्ने, संलग्नलाई पक्राउ गर्न प्रहरी परिचालन गरिएको पक्राउ परेका एकजना हाजिर जवानीमा रहेको, अन्यको खोजी कार्य जारी रहेकोले छिट्टै पक्राउ गर्ने दावी गरेका छन्। पछिल्ला केही महिनादेखी मकवानपुरका सिडिओ स्किम श्रेष्ठ र  र मकवानपुरका प्रहरी उपरीक्षक विश्वराज खड्का नेतृत्वको सुरक्षा कमाण्डले जिल्ला र बागमती प्रदेशको राजधानी हेटौंडाको सुरक्षा व्यवस्थापनको सवालमा चुकेको आरोप खेप्दै आएका छन् ।