शत्रुगते महयात्रा हेटौँडाबाट शुभारम्भ

२३ फागुन, हेटौँडा । चैत्र ९ गते प्रदर्शनमा आउने नेपाली चलचित्र शत्रु गतेको टोलीले शत्रुगते महयात्रा तय गरेको छ । बुधबार हेटौँडाबाट शुरु गरिएको यो यात्रा चितवन, बुटबल, पोखरा, विर्तामोड, दमक र इटहरीसम्म पुग्ने हेटौँडामा पत्रकार सम्मेलन गर्दै जानकारी दिईएको हो । चलचित्रका निर्माता हरिबंश आचार्यले चलचित्र अहिलेको युवापुस्तालाई केन्द्रित गरेर मधेश र पहाडबीच समधुर सम्बन्धबारे चित्रण गरिएको बताए । उनले आफु लामो समयपछि चलचित्र निर्माण र अभिनयमा आएको बताउँदै दर्शकहरुले शत्रुगते मनपराउनेमा ढुक्क रहेको बताए । कलाकार शिवहरी पौडेलले शत्रु गते दर्शकहरुले खोजेको चलचित्र बनेको दावि गरे भने कलाकार एवं निर्मात्री दिपाश्री निरौलाले आफुले बर्षमा दुई व्यानरमा चलचित्र लिएर आउने बाटो बनेको बताईन् । प्रस्तुत कर्ता किरण केसीले तँ त साह्रै बिग्रिस् नि बद्रीपछि शत्रु गते लिएर आएको भन्दै दर्शकले मन पराउने स्वादमा यो चलचित्र बनेको बताए । नायक पल शाह र नायिका आँचल शर्माले ‘हरिबंश दाई’ को व्यानरमा काम गर्न पाउँदा आफुहरु गौरवान्वित भएको बताए । चलचित्रका वितरक नरेन्द्र महर्जनले चैत ९ गते मह जोडीको सम्मानमा शत्रु गते बाहेक कुनै पनि चलचित्र प्रर्दशनमा नल्याउने प्रतिवद्धता व्यक्त गरे । प्रदिप भट्टराई निर्देशित यो चलचित्रमा २ दर्जनभन्दा बढि हास्यकलाकारहरुले अभिनय गरेको बताईएको छ ।