न्याय सम्पादन विवेकपूर्ण हुनुपर्छ : मूख्यमन्त्री पौडेल

२४ फागुन, हेटौँडा । ३ नम्बर प्रदेशका मूख्यमन्त्री डोरमणी पौडेलले न्याय सम्पादन विवेकपूर्ण ढंगबाट हुनु जरुरी रहेको बताए । मकवानपुरका न्यायिक समितिका पदाधिकारीहरुका लागि शुरु भएको प्रशिक्षण कार्यक्रममा बोल्दै मूख्यमन्त्री पौडेलले पहिलो अभ्यास भएपनि न्यायिक समितिले कार्यसम्पदान गर्दा विवेकपूर्ण ढंगले काम गर्नुपर्ने बताएका हुन् । उनले विवेकपूर्ण ढंगले काम नगरी न्याय सम्पदानमा त्रुटि भए यसैलाई आधार बनाएर अधिकार खोस्न कर्मचारीतन्त्र अग्रसर हुनसक्नेतर्फ पनि सचेत रहनु जरुरी रहेको बताए । उनले सर्वोच्च अदालतका मूख्य न्यायाधिश गोपाल पराजुलीको अहिलेको कार्यशैलीले न्याय क्षेत्रप्रति वितृष्णा बढाउने काम भएको बताए । प्रदेश सरकार पनि आफ्नो ऐन कानून बनाउने क्रममा रहेको उनको भनाई थियो । कार्यक्रममा सर्वोच्च अदालतका पूर्व न्यायाधिश राजेन्द्रकुमार भण्डारी, मकवानपुरका प्रमुख जिल्ला अधिकारी चक्रबहादुर बुढा, पूर्व न्यायाधिश फोरमका महासचिव शम्भुबहादुर खड्का, जिल्ला समन्वय समितिका उपप्रमुख भगवति पुडासैनी लगायतले राज्यको पूर्नसंरचनाका क्रममा सबै खाले अधिकार तल्लो तहसम्म आईपुगेको बताउँदै न्यायिक क्षेत्रको कार्य सम्पदानका क्रममा निष्पक्ष र स्वतन्त्र ढंगले काम गर्नुपर्नेमा जोड दिएका थिए । कार्यक्रम जिल्ला समन्वय समितिका मकवानपुरका प्रमुख रघुनाथ खुलालको अध्यक्षतामा भएको थियो ।