हेटौंडामा प्रहरीले बरामद गर्यो प्रदर्शनमा चोरी भएको दुई ट्रक सामान

२८ भदौ, हेटौँडा। भदौ २४ गते भएको जेनजीको प्रदर्शनमा लुटपाटमा भएका सामान र  संलग्नलाई मकवानपुर प्रहरीले पक्राउ गर्न सक्रियता देखाएको छ।

यसै क्रममा शनिबार बिहान हेटौंडा ४ कर्राबाट ठूलो संख्यामा हेटौंडाको विभिन्न स्थानबाट लुटपाट गरिएको सामग्री सहित केही व्यक्तिलाई प्रहरीले नियन्त्रणमा लिएको छ। नेपाल प्रहरीले हिजो मात्र लुटपाट भएको व्यक्तिलाई सामान फिर्ता गर्न र भिडियो सामग्री भए प्रहरीलाई उपलब्ध गराउन सार्वजनिक अपिल गरेको थियो। स्थानीयवासीको सहयोगमा वडा प्रहरी कार्यालय हेटौंडा, सानोपोखराले कर्राबाट बागमती प्रदेश स्वास्थ्य मन्त्रालयको हेटौंडा १० स्थित मन्त्रालयबाट लुटपाट गरिएको दराज, टेबल, कुर्सी कम्प्युटर सहितका २ ट्रक सामान बरामद गरेको हो । प्रहरीले बरामद सामान सहित केही व्यक्तिलाई पक्राउ गरेको छ। स्थानीयका अनुसार घटना भएको दिन २४ गते राति ट्रकमा लोड गरेर उक्त स्थानमा सामान लुकाएको जनाएका छन् । यता मकवानपुर प्रहरी प्रवक्ता प्रहरी नायब उपरीक्षक श्यामु अर्यालले लुटपाटको घटनामा संलग्न कसैलाई पनि नछोड्ने जनाएका छन्। यता स्थानीय निरज सिंह ठकुरीले लुटपाट संलग्न व्यक्तिको नागरानी गरिएको र लुटपाटका सामान प्रहरीलाई बुझाइएको बताएका छन्।