मुग्लिन-नारायणगढ सडकखण्ड ठप्प हुँदा मकवानपुरका सडकमा सवारी चाप बढ्यो

५ असोज, हेटौंडा। पछिल्लो ३७ घण्टादेखि मुग्लिन नारायणगढ सडकखण्ड ठप्प छ । सडकखण्ड अन्तर्गत चितवनको इच्छाकामना गाउँपालिका वडा नम्बर ५ तुइनखोला पुल नजिक ठूलो पहिरो खस्दा शुक्रबार साँझ ६ बजेर ३० मिनेटबाट अवरुद्ध आइतबार बिहानसम्म पनि संचालनमा आउन सकेको छैन ।

शनिबार दिनभर पहिरो हटाउन सडक डिभिजन कार्यालय भरतपुरबाट मुग्लिन तर्फ २ ओटा लोडर र एउटा एक्साभेटर, नारायणगढ तर्फ एक एक ओटा  लोडर र एक्साभेटर प्रयोग गरेपनि पहिरो नरोक्किदा बाटो खुलाउन सम्भव नभएको प्रहरीले जनाएको छ । सडक खण्डमा सयौ सवारी जाममा परेका छन्। रातभरका यात्रु र सडकको वस्तुअवस्था बुझ्न चितवनका सिडिओ गणेश अर्याल र प्रहरी प्रमुख एसपी गोविन्द पुरीको टोली घटनास्थल पुगेको थियो । घटनास्थल पुगेका सुरक्षानिकायको टोलीले यात्रुलाई विस्कुट, चाउचाउ पानी वितरण गरेको थियो। यता सडक डिभिजन कार्यालयका सुपरभाइजर ईश्वर क्षेत्रीले पहिरो नखसे अपरान्ह सम्म सडक संचालनमा ल्याइने जानकारी दिएका छन्। मुग्लिन नारायणगढ ठप्प हुदा मकवानपुर भएर काठमाडौं जाने सवारीको चाप बढेको जिल्ला ट्राफिक प्रहरी कार्यालय मकवानपुरका प्रहरी निरीक्षक बच्चुराम फूयालले बताएका छन् । मकवानपुर भएर त्रिभुवन राजपथ, कान्तिलोकपथ, भिमफेदी फाखेल, सिस्नेरि सडकखण्डमा सवारी चाप बढेको र सवारी चापलाई मध्यनजर गरेर ट्राफिक व्यवस्थापन गरिएको जनाइएको छ।