लेकालि बसिफाँटमा कवि सम्मेलन

२९ फागुन, हेटौँडा । भीमफेदी गाउँपालिका–९ मा रहेको लेकाली बसिफाँट माध्यमिक विद्यालयले आफ्नो रजत जयन्तीको अवसरमा कवि सम्मेलनको आयोजना गरेको छ ।

मकवानपुरका प्रतिष्ठित कवि तथा साहित्यकारहरुको सहभागितामा विद्यालयले कवि सम्मेलनको साथै माध्यमिक तहमा साहित्य विषयक कार्यपत्रसमेत प्रस्तुत भएको थियो । कार्यपत्र प्रस्तुत गर्दै मकवानपुर बहुमुखी क्याम्पसका उपप्राध्यापक घनश्याम घिमिरेले कक्षा ८ देखि १२ कक्षासम्मका पाठ्यपुस्तकमा समेटिएका साहित्यिक रचनाहरुमा बाहुन क्षेत्री समुदाय एवम् पहाडी समुदायलाई मात्र समेटेको विश्लेषण गरे । कवि सम्मेलनमा साहित्य संगम मकवानपुरका अध्यक्ष निमेष निखिल, गजल मञ्च मकवानपुरका अध्यक्ष देवराज तिवारी, झर्ना साहित्य परिवार मकवानपुरका अध्यक्ष दीपक गौतम, प्रगतिशील लेखक संघ मकवानपुरका अध्यक्ष पुरुषोत्तम आचार्य, पालुङ साहित्य परिषद्का अध्यक्ष बिर्खे अन्जान, केशव समर्पण लगायतले लगायतले कविता तथा गजल बाचन गरेका थिए ।

विद्यालय व्यवस्थापन समितिका अध्यक्ष विनोद लामाको अध्यक्षतामा भएको कार्यक्रममा थाहा नगरपालिकाका प्रमुख लवशेर विष्टको प्रमुख आतिथ्यता रहेको थियो । विद्यालयले आफ्नो रजत जयन्तीको अवसरमा कृषक अभिभावकहरुको लागि जेटिए प्रशिक्षणात्मक कार्यक्रम, घैटो फुटाउने प्रतियोगिता र शिक्षकको म्यूजिकल चियर प्रतियोगिता भएको विद्यालयका शिक्षक यश लामाले जानकारी दिए ।