राष्ट्रियसभा सदस्य निर्वाचन प्रयोजनका लागि हेटौंडामा कार्यालय स्थापना

१६ पुस,हेटौडा । आगामी माघ ११ गते हुने राष्ट्रिय सभा सदस्य निर्वाचनका लागी हेटौंडामा बुधबार निर्वाचन अधिकृतको कार्यालयको स्थापना गरिएको छ । निर्वाचन कार्यक्रम संचालनका लागी हेटौंडा उपमहानगरपालिका वडा नम्बर ५ मा रहेको प्रदेश निर्वाचन आयोगको कार्यालय बागमती प्रदेशको भवनमा निर्वाचन अधिकृतको कार्यालय स्थापना गरिएको हो ।  जिल्ला न्यायाधीश एवं निर्वाचन अधिकृत गीता श्रेष्ठले जिल्ला न्यायाधीश एवं निर्वाचन अधिकृत गीता श्रेष्ठले निर्वाचन अधिकृतको कार्यालयको उदघाटन गरेकी हुन् ।

उक्त कार्यालयबाट बागमती प्रदेशमा एक जान महिला र अन्य गरी दुई जनाको निर्वाचन कार्यक्रम संचालन हुने जिल्ला न्यायाधीश एवं निर्वाचन अधिकृत गीता श्रेष्ठले जानकारी दिइन । राष्ट्रिय सभामा बागमती प्रदेशबाट एकजना महिला र एकजना अन्य गरी दुईजनाको पद रिक्त हुँदैछ । मतदान प्रक्रियाअनुसार प्रदेश सभा सदस्यले सेतो कागजमा हरियो रङको मसीले विवरण तथा चिह्न उल्लेख गर्नेछन् भने स्थानीय तहका प्रतिनिधिले रातो रङको मसीले मतदान गर्नेछन्। निर्वाचन आयोगले राष्ट्रिय सभा निर्वाचनका लागि माघ ११ गते बिहान ९ बजेदेखि दिउँसो ३ बजेसम्म मतदान समय तोकेको छ । निर्वाचन कार्यतालिका अनुसार पुस १९ गते बिहान १० बजेदेखि ११ बजेसम्म मतदाता नामावली प्रकाशन हुनेछ । सोही दिन ११ बजेदेखि पुस २० गते अपराह्न ४ बजेसम्म दाबी–विरोधका उजुरी दिन सकिनेछ । पुस २१ र २२ गते उजुरीमाथि छानबिन हुनेछ भने पुस २२ गते दिउँसो ३ देखि ४ बजेसम्म अन्तिम मतदाता नामावली प्रकाशन गरिनेछ। पुस २३ गते बिहान १० देखि दिउँसो ३ बजेसम्म उम्मेदवारको मनोनयन दर्ता तथा सोही दिन दिउँसो ३ देखि ४ बजेसम्म उम्मेदवारको सूची प्रकाशन गरिनेछ। बागमती प्रदेश निर्वाचन कार्यालयका प्रमुख हरिप्रसाद ढकालका अनुसार बागमती प्रदेश सभाका ११० जना सदस्य र प्रदेशका १३ जिल्लाका स्थानीय तहका प्रमुख तथा उपप्रमुख २३८ जना गरी कुल ३४८ जना मतदाता रहेका छन्। राष्ट्रिय सभा निर्वाचनमा प्रदेश सभा सदस्य तथा स्थानीय तहका प्रमुख–उपप्रमुखले मतदान गर्न पाउने व्यवस्था छ। मतदान स्थल हेटौंडा ४ मा रहेको भुटनदेवी मा विको प्राविधिक भवनलाई तोकिएको छ ।