नक्कली उद्धारमार्फत ठगेको आरोपमा ६ जना पक्राउ

फाइल तस्विर

१२ माघ, हेटौंडा । नेपालको पर्वतारोहण र पदयात्रा क्षेत्रमा विदेशी पर्यटकहरूलाई लक्षित गरी नक्कली उद्धारमार्फत अर्बौँ रुपैयाँ ठगी गर्ने ठूलो गिरोहलाई नेपाल प्रहरीको केन्द्रीय अनुसन्धान ब्युरो (सीआईबी)ले सार्वजनिक गरेको छ।
पत्रकार सम्मेलनमा सीआईबी प्रमुख प्रहरी अतिरिक्त महानिरीक्षक (एआईजी) डा. मनोजकुमार केसीले साढे दुई महिनाको विस्तृत अनुसन्धानपछि तीनवटा कम्पनीका ६ जना सञ्चालक तथा कर्मचारीलाई पक्राउ गरिएको जानकारी दिए।
पक्राउ पर्नेहरूमा नेपाल चार्टर सर्भिसका रविन्द्र अधिकारी र विवेकराज थपलिया, माउन्टेन रेस्क्यु सर्भिसका जयराम रिमाल र विवेक पाण्डे, तथा एभरेस्ट एक्स्पेरेन्स एन्ड एसिस्टेन्सका मुक्ति पाण्डे र सुभाष केसी रहेका छन्।
उनीहरूले हिमाली क्षेत्रमा सामान्य टाउको दुखाइ वा थकान भएका पर्यटकलाई पनि ‘एक्युट माउन्टेन सिकनेस’ भएको भनी झूटो रिपोर्ट बनाएर अनावश्यक रूपमा हेलिकप्टरमार्फत उद्धार गर्ने र अन्तर्राष्ट्रिय बिमा कम्पनीहरूबाट मोटो रकम असुल्ने गरेको पाइएको छ।
सीआईबीको अनुसन्धानले यो गिरोहले निकै योजनाबद्ध ढंगले ठगी गर्ने गरेको देखाएको छ । उनीहरूले चार्टर उडानलाई उद्धारमा रूपान्तरण गर्ने, एउटै उडानमा धेरै बिमा दाबी गर्ने र निजी अस्पतालहरूसँगको मिलेमतोमा फर्जी बिल तयार पार्ने गरेको खुलेको छ ।