मकवानपुरमा मतदानको तयारी सबै पुरा

२० फागुन,हेटौंडा । फागुन २१ गते बिहीबार हुने प्रतिनिधिसभा सदस्य निर्वाचनका लागि मकवानपुरमा मतदानका लागि सबै तयारी पूरा गरिएको छ। बिहीबार बिहान ७ बजेबाट सुरु हुने मतदानका लागि जिल्लाका १० ओटै स्थानीय तह अन्तर्गत  मतदानस्थलमा बुथ निर्माण, घेराबार, लाइन व्यवस्थापनको तयारी पुरा भएको  मकवानपुरका मुख्य निर्वाचन अधिकृत गीता श्रेष्ठले बताइन्। 
मकवानपुरका  १६७ मतदानस्थल अन्तर्गत ३७४ मतदान केन्द्रमा ज्येष्ठ नागरिक, अपांगता भएका व्यक्ति, गर्भवती, सुत्केरी, किरियापुत्री तथा अशक्त मतदाताका लागि छुट्टै लाइनको व्यवस्था गरिएको बताइएको छ । 

जिल्लामा कुल ३ लाख १५ हजार ३ सय ३४ मतदाता रहेका छन्। तीमध्ये क्षेत्र नम्बर १ मा १ लाख ५८ हजार ४३५ र क्षेत्र नम्बर २ मा १ लाख ५६ हजार ८९९ मतदाता छन्। कुल मतदातामध्ये महिला १ लाख ५३ हजार ३७६, पुरुष १ लाख ६१ हजार ९५३ र अन्य ५ जना रहेका छन्।
मकवानपुरका दुई प्रतिनिधिसभा निर्वाचन क्षेत्रमा कुल ४४ जना उम्मेदवार चुनावी प्रतिस्पर्धामा छन्। क्षेत्र नम्बर १ मा २३ जना र क्षेत्र नम्बर २ मा २१ जना उम्मेदवार रहेका छन्।  यस पटक रातो रङको मतपत्र प्रत्यक्ष तर्फ र कालो रङको मतपत्र समानुपातिक तर्फ रहेको छ । मतदानको समय बिहान ७ बजेबाट साझॅं ५ बजे सम्मलाई तोकिएको छ। यस पटक मतगणना हेटौंडा ४ मा रहेको भुटनदेवी मा वि मा कायम गरिएको छ ।