उपकरण विर्गान कर्मचारी नै सक्रिय

१२ चैत, हेटौँडा । सरकारले सर्वसाधारणलाई सहज स्वास्थ्य सेवा उपलव्ध गराउन हेटौँडाको सरकारी अस्पतालमा विभिन्न उपकरण उपलव्ध गराएको छ ।

तर, अस्पतालका कर्मचारीहरु भने ति उपकरण विगार्दै नीजि अस्पताल तथा क्लिनिकबाट विरामीलाई सेवा लिन बाध्य बनाईरहेका छन् । दुई बर्ष अघि हेटौँडा अस्पतालबाट इसिजि मेसिन एकाएक गायब भयो । प्रहरी÷प्रशासनले अनुसन्धान अघि बढाएपछि मेसिन केही दिनपछि फोहोर फ्याँक्ने थुप्रोमा वेवारिसे अवस्थामा फेला परेको थियो । इसिजि मेसिन हाल विग्रिएर थन्किएको छ । अस्पतालका २ वटा एक्सरे मेसिन पनि १५ दिनदेखि विग्रिएर थन्किएका छन् ।

मेसिन विग्रिएपछि अस्पताल विकास समितिको आग्रहमा स्वास्थ्य सेवा विभागका अर्थोपेडिक डा. रामचन्द्र सुवेदीसहित ३ सदस्यीय टोलीले मेसिन जाँच गर्यो । टोलीले एक्सरे मेसिनलाई केही ठोस बस्तुले हिर्काउर विगारिएको भन्ने रिर्पोट अस्पताल विकास समितिलाई बुझाएपछि प्रशासनले एक्सरे मेसिन कर्मचारीकै लापरवाहीले विगारिएको आशंकामा छानविन गरिरहेको छ । प्रमुख जिल्ला अधिकारी चक्रबहादुर बढाले एक्सरे मेसिनमा केही धारिलो बस्तुले प्रहार गरेर विगारेको पाईएको बताए । उनले यसविषयमा छानविन भईरहेको बताए ।

मेसिन सञ्चालन नहुँदा यहाँ काम गर्ने ५ जना कर्मचारी १५ दिनदेखि हासिज गरेर घर फर्कने गरेका छन् । रेडियोग्राफर अरुणकुमार मण्डलले दाँतको मात्र एक्सरे हुने गरेको बताए । अस्पतालमा कार्यरत कर्मचारीले बाहिर नीजि क्लिनिक सञ्चालन गर्ने र अस्पतालमा भएका उपकरण विगार्ने प्रवृत्तिका कारण हेटौँडा अस्पतालमा उपकरण विग्रने समस्या बढेको हेटौँडा सन्देश दैनिकमा समाचार छ ।