राप्रपाका कारण बागमतीमा अन्यौल, कुमारीले मत नदिन, उद्धवले दिन ह्विप

८ भदौ, हेटौंडा । राष्ट्रिय प्रजातन्त्र पार्टीको विवादका कारण बागमती प्रदेशमा अन्यौलता उत्पन्न भएको छ । मुख्यमन्त्री किरण थापा मगरले विश्वासको मत लिन लाग्दै गर्दा सत्ता साझेदार दलको विवादले बागमती प्रदेशमा अन्यौलता बढेको हो ।
संवैधानिक प्रावधान अनुसार आज विश्वासको मत लिएर आफ्नो कामलाई गति दिन खोजेका मुख्यमन्त्री मगरको विश्वासको मतमाथि राप्रपाको विवादले अन्यौलता थपेको छ । यसअघि प्रमुख सचेतक रहेकी कुमारी तामाङले मगरलाई विश्वासको मत नदिन ह्विप जारी गरेकी थिईन् भने अहिले प्रमुख सचेतकै नामबाट डम्बर तामाङले मुख्यमन्त्री मगरको पक्षमा मत दिन ह्विप जारी गरेका छन् । केन्द्रको कारबाहीमा परेका राप्रपा बागमती प्रदेशका सांसद उद्धव थापाले संसदीय दलको नेताको हैसियतबाट प्रमुख सचेतकबाट कुमारीलाई हटाएर डम्बरलाई प्रमुख सचेतक बनाएका छन् ।
विवाद बढ्दै जाँदा राप्रपाले उद्धव थापालाई पदमुक्त नगरेसम्म बागमती प्रदेश सभाको बैठक चल्न नदिने अडान राखेको छ । राप्रपाले सभामुखले तत्काल कारबाही प्रक्रिया अगाडि नबढाएसम्म संसद चल्न नसक्ने बताईरहेको छ ।
नेकपा एमाले र नेकपाले विश्वासको मतको पक्षमा मत दिन ह्विप जारी गरेको छ भने कांग्रेसले विपक्षमा मत दिन ह्विप जारी गरेको छ । राप्रपाको विवाद र अन्य दल पक्ष विपक्षमा बाँडिदा विश्वासको मतबारे के हुने हो स्पष्ट हुन सकेको छैन ।