बागमतीमा मुख्यमन्त्री नियुक्तिः अदालतले दुबै पक्षलाई छलफलका लागि बोलायो

८ भदौ, हेटौंडा । बागमती प्रदेशका मुख्यमन्त्री किरण थापा मगरको नियुक्तिबारे परेको रिटमा दुबै पक्षलाई छलफलका लागि बोलाउने आदेश भएको छ ।
उच्च अदालत पाटन हेटौंडा इजलासमा दायर रिटमा हेटौँडा इजलासकी न्यायाधीश बबिता उप्रेतीको एकल इजलासबाट कारण देखाउ आदेश दिंदै दुबै पक्षलाई छलफलका लागि बोलाउने आदेश भएको हो । दुबै पक्षलाई भदौ १० गते छलफलका लागि बोलाईएको छ । मुख्यमन्त्री थापाको नियुक्तिको प्रक्रिया संविधान विपरीत रहेको दाबी गर्दै अधिवक्ता मोहनप्रसाद ढकाल र राप्रपा बागमती प्रदेशसभा संसदीय दलकी प्रमुख सचेतक कुमारी तामाङले छुट्टाछुट्टै उत्प्रेषण रिट दायर गरेकी हुन् ।
रिटमा प्रदेश प्रमुखको कार्यालय बागमती प्रदेश , बागमती प्रदेश प्रमुख माननीय दिपक प्रसाद देवकोटा , मुख्यमन्त्री तथा मन्त्रीपरिषद्को कार्यालय बागमती प्रदेश हेटौंडा मकवानपुर , बागमती प्रदेश सभा मकवानपुर हेटौंडा , सभामुख बागमती प्रदेश सभा मकवानपुर हेटौंडा , ने क पा एमाले बागमती प्रदेश सभा संसदिय दलका सदस्य माननिय किरण थापा मगर , राष्ट्रिय प्रजातन्त्र पार्टी बागमती प्रदेश सभा संसदिय दलका पुर्व नेता उद्धव थापा , ने क पा एमाले बागमती प्रदेश सभा संसदिय दलका नेता माननिय जगन्नाथ थपलिया र नेपाली कम्युनिष्ट पार्टी बागमती प्रदेश सभा संसदिय दलका नेता माननिय सालिकराम जमकटेललाई विपक्षी बनाइएको छ ।
राप्रपाको विवादबीच अदालतबाट आएको आदेशले थप जटिलता थपिएको छ ।