अद्यावधिक छुटेकालाई महाधिवेशनमा वञ्चित नगरिने

२९ भदौ, हेटौंडा । नेपाली कांग्रेसले १५औँ महाधिवेशनको प्रक्रियामा सहभागी हुनबाट छुटेका क्रियाशील सदस्यलाई समेत सहभागी गराउने निर्णय गरेको छ । सभापति गगन कुमार थापाको सभापतित्वमा पार्टी केन्द्रीय कार्यालयमा बसेको बैठकले यस्तो निर्णय गरेको हो ।
पार्टी सदस्यता व्यवस्थापन प्रणालीमा २०८२ पुस २१ गतेसम्म प्रविष्ट भएका तर विभिन्न कारणले अद्यावधिक हुन छुटेका क्रियाशील सदस्यलाई महाधिवेशन प्रक्रियाबाट वञ्चित नगरिने निर्णयलाई बैठकले कार्यान्वयन गर्ने जनाएको छ।
तर पार्टी परित्याग गरेका, अनुशासनको कारबाहीमा परी सदस्यता गुमाएका तथा प्रचलित कानुनअनुसार पार्टी सदस्य बन्न नमिल्ने व्यक्तिहरू भने यस व्यवस्थाबाट बाहिर रहनेछन्।
बैठकले विशेष महाधिवेशनमा सहभागी नभएका तर त्यसपछि सदस्यता अद्यावधिक तथा महाधिवेशन प्रक्रियामा सक्रिय रूपमा जोडिएका पार्टीका नेता–कार्यकर्ताको भूमिकाको सम्मानसमेत गरेको छ।
कांग्रेसले विशेष महाधिवेशन सम्पन्न हुनुअघिका तत्कालीन केन्द्रीय कार्यसमितिका सदस्यहरूलाई १५औँ महाधिवेशन प्रक्रियामा केन्द्रीय कार्यसमितिको सदस्यको हैसियतमा सहभागी गराउन विधानबमोजिम आवश्यक व्यवस्था गर्ने निर्णय गरेको छ।
बैठकले महाधिवेशनलाई केवल प्राविधिक प्रक्रिया नभई पार्टीको राजनीतिक ‘महाउत्सव’ भएको उल्लेख गर्दै पार्टीभित्रका असहमति, चासो र गुनासोलाई संवाद, सहमति र सहकार्यबाट समाधान गर्ने प्रतिबद्धता दोहोर्‍याएको छ।