विराट महायज्ञबारे छलफल सम्पन्न 

२५ चैत, हेटौँडा । हेटौँडामा आगामी बैशाख १ गतेबाट आयोजना हुने नयाँ बर्ष शुभकामना पञ्चबर्षिय विराट महायज्ञ २०७५ को विषयमा बृहत छलफल सम्पन्न भएको छ । 
गोरक्षश्वर क्षेत्र विकास समिति गोरक्षश्वर दिव्यधाममा आयोजित छलफल कार्यक्रममा वक्ताहरुले महायज्ञलाई तन मन र वचनले सहयोग गर्ने प्रतिवद्धता व्यक्त गर्ने थिए । महायज्ञ अनन्त श्री विभुषित स्वामी कमलनयनाचार्यको संरक्षकत्वमा संचालन हुने र देवी प्रतिभा पराजुलीले कलात्मक अभिव्यक्तिका साथ संगीतमय भागवत कथा प्रवचन गर्ने बताईएको छ । 
कार्यक्रममा संयोजक अजेयराज सुमार्गीले तयारी करिव अन्तिम चरणमा पुगेको बताउनुभयो । उनले देश एवं विदेशका प्रतिष्ठित व्यक्तित्वहरु, विभिन्न धार्मिक क्षेत्रका व्यक्तित्वको महायज्ञमा सहभागी हुने जानकारी समेत दिए । कार्यक्रममा स्वामी कविता गिरी, मकवानपुर उद्योग बाणिज्य संघका अध्यक्ष कृष्ण कटुवाल, श्रीरामभक्त हनुमान सेवा समितिका अध्यक्ष महेन्द्रनाथ अधिकारी लगायतका विभिन्न उपसमितिका पदाधिकारीहरुको उपस्थिति रहेको थियो । 
महायज्ञ अन्तरगत शान्ति शोभा कलश यात्रा, शंख घण्ट पञ्चेबाजा झाकी, खैजडि भजन, योगाभ्यास, दिप प्रज्वलन लगायतका गतिविधि हुने महायज्ञ मुल समारोह समितिका महासचिव ह्याग्रिव आचार्यले बताए ।