प्रदेशसभा बैठकबाट ४ विधेयक छलफलका लागि स्विकृत

२५ चैत, हेटौँडा । ३ नम्बर प्रदेशसभा बैठक ४ वटा विधेयकलाई छलफलका लागि स्विकृत गरेको छ । 
बैठकमा मूख्यमन्त्री डोरमणी पौडेलले प्रस्तुत गरेको ३ र आन्तरिक मामिला तथा कानूनमन्त्री शालिकराम जम्कट्टेलले प्रस्तुत गरेको एउटा विधेयक छलफलका लागि स्वीकृत भएको हो । बैठकमा मुख्यमन्त्री डोरमणि पौडेलले गाउँ, नगर तथा जिल्ला सभा सञ्चालन कार्यविधि सम्बन्धी विधेयक, मुख्यमन्त्री तथा मन्त्रीको पारिश्रमिक र अन्य सुविधा सम्बन्धी विधेयक र स्थानीय तहका पदाधिकारीहरुको सेवा सुविधा सम्बन्धी विधेयकसम्बन्धी प्रस्ताव पेश गरेका थिए । 
बैठकमा आन्तरिक मामिला तथा कानूनमन्त्री शालिकराम जम्कट्टेलले प्रदेशसभाका पदाधिकारी र सदस्यको पारिश्रमिक र सुविधा सम्बन्धमा व्यवस्था गर्न बनेको विधेयकसम्बन्धी प्रस्ताव पेश गरेका थिए । बैठकमा बोल्ने प्रदेशसभा सदस्यहरुले आप्mनो सेवा सुविधाबारे आएको विधेयकबारे असन्तुष्टि व्यक्त गरेका थिए । 
बैठकमा प्रदेश प्रमुख अनुराधा कोइरालाले यसअघि प्रदेशसभा बैठकले पारित गरेको ‘प्रदेश सरकारको आर्थिक कार्यविधि नियमित तथा व्यवस्थित गर्न बनेको विधेयक ’ र ‘प्रदेशस्तरका केही सार्वजनिक लिखत प्रमाणिकरण सम्बन्धमा व्यवस्था गर्न बनेको विधेयक’ प्रमाणिकरण भएको पत्र पढेर सुनाईएको थियो । बैठक चैत २९ गतेसम्मका लागि स्थगित भएको छ ।