सामाजिक सद्भावका लागि हेटौँडामा महायज्ञ हुने

२६ चैत, हेटौँडा । हेटौँडा–१० मा रहेको गोरक्षेश्वर दिव्यधाममा बैशाख १ गतेदेखि ७ गतेसम्म सामाजिक सद्भाव अभिबृद्धिका लागि महायज्ञ हुने भएको छ । नयाँ बर्ष शुभकामना पञ्चबर्षीय विराट महायज्ञ आयोजक मूल समारोह समितिले सोमबार पत्रकार सम्मेलन गरी यसको तयारीबारे जानकारी दिएको हो । 
पत्रकार सम्मेलनमा महायज्ञका संयोजक अजेयराज सुमार्गीले सामाजिक सद्भाव, भाईचारा अभिबृद्धि र जातीय विभेदको अन्त्यका लागि महायज्ञको आयोजना गरिएको जानकारी दिए । २०६० सालबाट शुरु भएको महायज्ञको यो चौथो पटक हो । ५ लाख भक्तजनको सहभागिता रहने महायज्ञमा करिव ५० हजार बढिलाई सामुहिक भोजनको व्यवस्था गरिएको जनाईएको छ । ६० देखि ६५ लाख रुपैँया महायज्ञ व्यवस्थापनका लागि खर्च हुने र ६० देखि ६५ लाख रुपैँया नै बचत हुने अनुमान गरिएको संयोजक सुमार्गीको भनाई छ । 
अन्य महायज्ञ जस्तो आर्थिक सहयोगका लागि महायज्ञ आयोजना नगरिएको बताउँदै शुभेच्छुक, शुभचिन्तकबाट प्राप्त सहयोग ग्रहण गर्ने उनको भनाई छ । बचत रकमबाट गोरक्षेश्वर दिव्यधाम क्षेत्रको विकासमा खर्च गरिने जनाईएको छ । यसअघिको महायज्ञबाट बचत भएको रकमबाट दिव्यधाममा पूर्वाधार, गुरुकुल संचालन लगायतका काम भईरहेको बताउँदै गोरक्षेश्वर क्षेत्र विकास समितिका अध्यक्ष उत्तम शर्मा ढकालले यस पटकको महायज्ञबाट थप टेवा पुग्ने विश्वास व्यक्त गरे । 
कथावाचक देवी प्रतिभा पराजुलीबाट कथावाचन हुने महायज्ञमा मुक्तिनाथ पिठाधिश स्वामी कमलनयनाचार्य, स्वामी हेमानन्द गिरी, ३ नम्बर प्रदेशका मूख्यमन्त्री डोरमणी पौडेल, एनआरएन सम्बद्ध व्यक्तित्वसहित आधात्मिक एवं सामाजिक क्षेत्रका महानुभावको सहभागिता रहने महायज्ञ मूल समारोह समितिका महासचिव ह्याग्रिव आर्चायले जानकारी दिए । महायज्ञमा खैजडि भजन प्रतियोगिता हुने जनाउँदै महासचिव आचार्यले प्रतियोगितामा प्रथम हुनेले नगद २० हजार, दोस्रोले १५ हजार र तेस्रो हुनेले १० हजार रुपैँया प्राप्त गर्ने जनाईएको छ ।