काठमान्डु गोर्खाजले विराटनगर किंग्सलाई हरायो

२० कार्तिक, हेटौंडा । नेपाल प्रिमियर लिग (एनपिएल)मा काठमान्डु गोर्खाजले विराटनगर किंग्समाथि ९ विकेटको रवाफिलो जित हासिल गरेको छ ।
टस हारेर पहिले ब्याटिङ गरेको विराटनगर ८३ रनमा समेटिएपछि काठमान्डुले ८४ रनको लक्ष्य ९.४ ओभरमै १ विकेट गुमाएर पूरा गर्‍यो ।
काठमान्डुको जितमा डेभिड वार्नरले २४ बलमा ४४ रनको अविजित इनिङ्स खेल्दा विलिय बोसिस्टोले २३ रन बनाएर साथ दिए ।
विराटनगरका लागि अपराजित पौडेलले १ विकेट लिएका थिए ।
त्यसअघि काठमान्डुको बलिङविरुद्ध विराटनगर सुरुवातबाटै दबाबमा रह्यो । परिणामत विराटनगर १८.३ ओभरमा ८३ रनमा समेटियो ।
उसको शीर्ष क्रम सुरुवातबाटै लडखडायो । विराटनगरका लागि नवौं नम्वरमा ब्याटिङका लागि आएका रुपेश सिंहले २६ रनको बनाउनुबाहेक अन्यको प्रदर्शन गतिलो रहेन । थप दोहोरो स्कोरका रुपमा एन्जेलो म्याथ्युजले २२ रन बनाउँदा बसिर अहमदले १० रन बनाए ।
विराटनगरलाई धारासायी बनाउने क्रममा सन्तोष यादवले ३ विकेट लिँदा सहान अर्चाहिगले २ तथा करण केसी, जहान्दाद खान, शहाव आलम र देव साहले १-१ विकेट लिए।
यो हारले विराटनगरलाई प्लेअफ समीकरणमा धक्का लागेको छ। उसलाई बाँकी दुवै खेल जित्नुपर्ने चुनौती थपिएको छ।