आदिवासी जनजातिद्वारा मूख्यमन्त्रीलाई ज्ञापनपत्र

२ बैशाख, हेटौँडा । नेपाल सरकारले सार्वजनिक विदा कटौति गरेको विरोधमा आदिवासी जनजाति सम्बद्ध संस्थाहरुले ३ नम्बर प्रदेशका मूख्यमन्त्री डोरमणी पौडेललाई ज्ञापनपत्र बुझाएका छन् ।  २०७५ सालको विदा कटौति गर्ने क्रममा संघीय सरकारले आफुहरुको पर्वमा दिईदैं आएको विदा कटौति भएको भन्दै उनीहरुले विरोध गरेका हुन् ।
मुख्यमन्त्रीको कार्यालय हेटौँडामा गुरुङ राष्ट्रिय परिषद् र नेपाल आदिवासी जनजाति महासंघ जिल्ला समन्वय परिषद् मकवानपुरले छुट्टा छुट्टै बुझाएका छन् । ज्ञापन पत्रमा आदिवासी जनजाति समुदायले मनाउँदै आएको तमू, सोनाम, ग्याल्वो ल्होसार, उधौली/उभौली, माघे संक्रान्ति, माघी पर्वलगायत संस्कृतको जर्गेनाका लागि मनाउने पर्वको सार्वजनिक बिदा कटौती गरेको भन्दै निर्णय फिर्ताका लागि संघीय सरकारसंग पहल गर्न माग गरिएको छ । 
नेपाल आदिवासी जनजाति महासंघ मकवानपुरका अध्यक्ष तिर्थ थापा मगर, तमु ह्युल छोंज धि गुरुङ राष्ट्रिय परिषद ३ नम्बर प्रदेश प्रमुख सन्तलाल गुरुङ र अध्यक्ष धर्मराज गुरुङले ऐतिहासिक सांस्कृतिक पर्व जर्गेनाका लागि यस्ता पर्व आवश्यक रहेको भन्दै मूख्यमन्त्रीलाई आफ्नो संस्थाको तर्फबाट ज्ञापनपत्र बुझाएका छन् । जनसंख्याको ३५.२ प्रतिशतले मनाउँदै आएको आप्mनो सांस्कृतिक पर्वहरुमा पाउँदै आएको विदाको निरन्तरता हुनुपर्ने नेपाल आदिवासी जनजाति महासंघ मकवानपुरले माग राखेको छ ।  
महासंघले बुझाएको ज्ञापन पत्रमा धर्म निरपेक्ष देशमा परापुर्व कालदेखि आदिवासी जनजातिहरुको सांस्कृतिक आहारको रुपमा प्रयोग हुँदै आएको गाईको मासुलाई सरकारले कानूनी मान्यता दिनुपर्ने र यही सवालमा जेल जीवन विताईरहेकाहरुलाई क्षतिपूर्तिसहित रिहार्य गर्नुपर्ने, प्रदेशको नामाकरण गर्दा पहिचानको आधारमा गरिनुपर्ने लगायतका ६ बुँदे माग राखेको छ । 
ज्ञापनपत्र बुझ्दै मूख्यमन्त्री पौडेलले आफुले यसलाई सकारात्मक रुपमा लिएको भन्दै मागलाई प्रधानमन्त्री कार्यालयमा पुग्ने व्यवस्था गर्ने बताए ।