पूर्वप्रधानमन्त्री शेरबहादुरद्वारा महायज्ञको अवलोकन

३ बैशाख, हेटौँडा । पूर्व प्रधानमन्त्री शेरबहादुर देउवाले हेटौँडामा जारी नयाँ बर्ष शुभकामना विराट महायज्ञको अवलोकन गरेका छन् । पार्टी कामको सिलसिलामा हेटौँडा आईपुगेका देउवाले गोरक्षेश्वर दिव्यधाममा सामाजिक सद्भावका लागि शनिबारबाट जारी महायज्ञको अवलोकन गरेका हुन् ।

महायज्ञमा शुभकामना व्यक्त गर्दै देउवाले यस्ता खाले महायज्ञले सामाजिक सद्भाव र धार्मिक सहिष्णुता काम गर्न सहयोग पुग्ने बताए । उनले नेपालका चर्चित उद्यमी अजेयराज सुमार्गीको संयोजकत्वमा महायज्ञ भईरहेको भन्दै सफलताको शुभकामना व्यक्त गरे । प्रत्येक ५/५ बर्षमा निरन्तर महायज्ञ गर्दै आएको भन्दै महायज्ञ मूल समारोह समितिका संयोजक सुमार्गीको देउवाले प्रशंसा समेत गरे । 

सानै उमेरमा कथावाचन गरेर धार्मिक एवं सामाजिक हितमा लागेको भन्दै पूर्व प्रधानमन्त्री देउवाले कथावाचक देवीप्रतिभा पराजुलीको पनि प्रशंसा गरे । महायज्ञमा नेपाली कांग्रेसका केन्द्रीय सदस्य प्रकाशशरण महत, ३ नम्बर प्रदेश नेपाली कांग्रेस संसदीय दलका नेता ईन्द्रबहादुर बानियाँ, पूर्व सभासद् प्रल्हाद लामिछाने, नेपाली सेनाका सहायक रथी सञ्जय भण्डारी लगायतको पनि उपस्थिति रहेको थियो । महायज्ञ अन्तरगत सोमबार सिर्जना मिलन टोल खैजडी भजन समूह हेटौँडा–९ र ऋषेश्वर खैजडी भजन समूह हेटौँडा–१२ बीच प्रतिष्पर्धा भएको महायज्ञ मूल समारोह समितिका महासचिव ह्याग्रिव आचार्यले जानकारी दिए ।