किर्ते काण्डमा शाखा अधिकृत पक्राउ

५ असोज, हेटौंडा । किर्ते कागजातबाट स्वास्थ्यकर्मी सरूवा प्रकरणमा बुधबार एक अधिकृत पक्राउ परेका छन् । प्रहरीले काठमाण्डौबाट मध्यमाञ्चल क्षेत्रीय स्वास्थ्य निर्देशनालयका शाखा अधिकृत बासु गजुरेललाई दिउँसो पक्राउ गरेको हो । 
उनलाई जोरपाटी अासपासबाट पक्राउ गरेको प्रहरी स्रोतले जानकारी दियो । पक्राउको पुष्टि गरेपनि नाम भने प्रहरीले दिन चाहेन । क्षेत्रीय कार्यालयमा गजुरेल एकमात्र शाखा अधिकृत रहेको निर्देशनालय स्रोतले बतायो । उनलाई काठमाडौंबाट हेटौंडा पठाउने प्रक्रिया थालिएको र विहिबार हेटौंडा अाईपुग्ने प्रहरीको भनाई छ । 
किर्ते कागजातका आधारमा रौतहटबाट ललितपुर सरुवा भएकी अनमी मन्दिरा श्रेष्ठ, सर्लाही सरुवा भएका अहेव दिनेशप्रसाद शाह र पर्सा सरुवा भएका हेल्थ असिष्टेन्ट राजकिशोर यादवलाई भदौ ३० गते प्रहरीले पक्राउ गरेको थियोे । उनीहरूलाई जिल्ला अदालत मकवानपुरबाट म्याद थप गरि मकवानपुर प्रहरीले अनुसन्धान गरिरहेको छ ।
उनीहरू पक्राउ परेसंगै गजुरेल कार्यालयमा नअाई सम्पर्कविहिन थिए । उनलाई पक्राउ गरेपनि घटनामा संलग्नता भए नभएको अनुसन्धानबाट खुल्ने छ । शाखा अधिकृत पक्राउ परेसंगै घटनामा माथिल्लो तहका कर्मचारीसहित गिरोह संलग्न रहेको अाशंकालाई बल पुगेको छ ।