बालविवाहमुक्त प्रदेश बनाउने मन्त्री दुलालको अठोट

३ जेठ, हेटौँडा । ३ नम्बर प्रदेशका सामाजिक विकास मन्त्री युवराज दुलालले ३ नम्बर प्रदेशलाई बालविवाहमुक्त प्रदेश बनाउने अठोट गरेका छन् । मन्त्रालयको आयोजनामा हेटौँडामा भएको प्रारम्भिक प्रोफाइल सार्वजनिकिकरण कार्यक्रममा बोल्दै प्रदेशमा रहेको बालविवाहको समस्या अन्त्य गर्दै बालविवाहमुक्त प्रदेश बनाउने अठोट गरेका हुन् । 
प्रदेशमा रहेका केही बाल गृहहरुले धर्म परिवर्तनलाई प्रोत्साहन गरिरहेको भन्दै उनले यसलाई कडाईका साथ अनुगमन गरी कारवाही गरिने बताए । बालगृहहरुमा नै बढि बालअधिकार हनन भईरहेको भन्दै उनले त्यस्ता बालगृहबाट बालबालिकालाई उद्धार गरिने बताए । प्रदेश सरकारले बाल संरक्षण केन्द्रको स्थापना गरी उनीहरुलाई सबै किसिमका सुविधा प्रदान गर्ने मन्त्री दुलालको भनाई छ ।
आफुले पदभार ग्रहण गर्दा पहिलो कामको रुपमा ३ नम्बर प्रदेशको स्वास्थ्य, शिक्षा, सामाजिक सुरक्षा, महिला तथा बालबालिका लगायत क्षेत्रको तथ्यांकीय प्रोफाइल तयार गर्ने पत्रमा हस्ताक्षर भएको भन्दै यो काम पुरा भएको बताए । उनले तथ्यांकलाई निरन्तर परिमार्जन गरी यसकै आधारमा आगामी आर्थिक बर्षमा बजेट विनियोजन गरिने बताए । 
३ नम्बर प्रदेशका मूख्यमन्त्री डोरमणी पौडेलको प्रमुख आतिथ्यतामा भएको कार्यक्रममा मन्त्रालयका जनस्वाथ्य प्रशासक सतिश विष्टले प्रदेशको अवस्थाबारे अवगत गराएका थिए ।