२७ प्रदेशसभा सदस्यबाट बैठकमा सुझाव पेश

३ जेठ, हेटौंडा । ३ नम्बर प्रदेशसभा बैठकमा विहिबार विनियोजन विधेयक ०७५/०७६ को सिद्धान्त र प्राथमिकता (कर प्रस्ताव बाहेक) बारे विहिबार २७ जना प्रदेशसभा सदस्यले सुझाव राखेका छन् । 
बैठकमा उनीहरुले सिद्धान्त र प्राथमिकतालाई ठोस ढंगले प्रस्तुत गर्न नसकेको भन्दै हरेक विषयलाई ठोस ढंगले ल्याउन सुझाव दिएका छन् । बैठकमा भाग लिंदै शान्तिप्रसाद पौडेल, कुमारी मोक्तान, जीवन डंगोल, रमेश पौड्याल, सिर्जना शैंज्यु, लक्ष्मण लम्साल, रजनी अमात्य लगायतका प्रदेश सभा सदस्यहरुले उत्पादनमुलक क्षेत्रलाई बढि प्राथमिकता दिनुपर्ने, आयात प्रतिस्थापनको ठोस नीति ल्याउनुपर्ने, जलस्रोतको उपयोगका लागि स्पष्ट अवधारणा आवश्यक लगायतका धारणा राखेका थिए । 
बैठकमा बोल्ने प्रदेशसभा सदस्यहरुले समाजवाद उन्मुख निति तथा कार्यक्रम आउनुपर्ने भन्दै शिक्षा, स्वास्थ्य र रोजगारीलाई ठोस ढंगले सम्बोधन गर्नु जरुरी रहेको बताएका थिए । उनीहरुले कृषिमा विचौलियाको अन्त्य, चक्लाबन्दीमार्फत कृषिलाई प्रवर्धन, निर्यातजन्य उद्योगलाई प्रोत्साहन जस्ता क्षेत्रमा नीति तथा कार्यक्रम केन्द्रित हुनुपर्नेमा जोड दिएका थिए । 
प्रदेश सभा बैठकमा ३ नम्बर प्रदेशका आर्थिक मामिला तथा योजना मन्त्री कैलाश ढुंगेलले विहिबार १४ सिद्धान्त र १२ प्राथमिकताका आधारमा नीति तथा कार्यक्रम आउने बताएका थिए । उनले प्रदेशमा रहेको स्रोत साधनलाई बैज्ञानिक ढंगले उपयोग गर्ने गरी आगामी बजेट आउने बताए । अन्य प्रदेशभन्दा यो प्रदेशको सम्भावना बढि रहेको उनको भनाई छ । 
विनियोजन विधेयक ०७५/०७६ को सिद्धान्त र प्राथमिकताबारे विहिबार शुरु भएको छलफल १० घण्टा चल्ने प्रदेशसभा सचिवालयले जनाएको छ । छलफलका लागि एमालेलाई साँढे ४ घण्टा, नेपाली कांग्रेस र माओवादी केन्द्रलाई २/२ घण्टा र अन्य दललाई डेढ घण्टा समय तय भएको छ । प्रदेश सरकारले असार १ गते आर्थिक बर्ष ०७५÷०७६ का लागि बजेट ल्याउने जनाएको छ ।