नेता बाँनियाले सोधे–‘डोको र बेल्चा बोकेर समृद्धि आउँछ ?’

७ जेठ, हेटौँडा । ३ नम्बर प्रदेश प्रमुख प्रतिपक्ष दलका नेता एवं नेपाली कांग्रेस संसदीय दलका नेता ईन्द्रबहादुर बानियाँले डोको र बेल्चा बोकेर समृद्धि आउँछ ? भन्दै प्रदेश सरकारको कटाक्ष गरेका छन् । 
हेटौँडामा सोमबारदेखि शुरु भएको ३ नम्बर प्रदेश समन्वय परिषद बैठकमा बोल्दै नेता बानियाँले विकास निर्माणको काम तिब्र गतिमा भईरहेको अहिलेको समयमा नदिजन्य कच्चा पदार्थ उत्पादन गर्ने क्रसर उद्योग बन्द गरेर विकास सम्भव नरहेको भन्दै डोको र बेल्चाको भरमा अहिलेको युगमा विकास नहुने बताए । विकासका लागि आवश्यक ढुंगा, गिटि र बालुवाको अभावमा काम गर्ने अवस्था नरहेको भन्दै उनले निर्माण व्यवसायीलाई थुनेर कागज गर्दैमा विकास नहुने दावि गरे । 
‘ढुंगा, गिटि र बालुवा उत्पादन गर्ने क्रसर बन्द गर्ने, अनि निर्माण व्यवसायीलाई थुनेर कागज गराउने ?’–उनले भने–‘यस्तो तरिकाले कसरी विकास हुन्छ ?’ विधिवत रुपमा संस्था दर्ता गरेर सेवा दिईरहेका संस्थाको खाता बन्द गरेको प्रति पनि उनले आपत्ति जनाए । सरकारले अपराधीलाई जस्तो व्यवहार गर्दै यातायातसंग सम्बन्धित संस्थाको खाता बन्द गर्नु गैरजिम्मेवारपूर्ण व्यवहार भएको बाँनियको भनाई छ । उनले देश कानून अनुसार चल्नुपर्नेमा जोड दिए । सिण्डिकेट वा कार्टेलिङ गर्नेलाई कानून अनुसार नै कारवाही गरिनुपर्ने भन्दै उनले सबैलाई एकै ढंगले हेर्न नहुने बताए । 
उनले विकासमा नेपाली कांग्रेस प्रतिपक्षमा नरहने बताउँदै प्रदेश सरकारको साथका लागि तयार रहेको बताए । तर कानून र विधिको शासनको वेवास्ता गर्दै आफु खुशी चले चुप लागेर नबस्ने समेत उनको भनाई थियो । जनताको पहिलो सरकार स्थानीय तह भएकाले सबैले जनताको हितलाई प्राथमिकतामा राखेर काम गर्नुपर्नेमा बानियाँले जोड दिए । ३ नम्बर प्रदेशलाई मानवताको प्रदेश बनाउन सबैको सहयोग आवश्यक रहेको उनको भनाई थियो ।