जनताको काममा प्रतिवद्ध भई लाग्न बानियाँको आग्रह

तस्विर : बानियाँको फेसबुक पेजबाट

८ जेठ, हेटौँडा । नेपाली कांग्रेस ३ नम्बर प्रदेश संसदीय दलका नेता ईन्द्रबहादुर बानियाँले जनताको काममा प्रतिवद्ध भएर लाग्न आप्mनो पार्टी निकट जनप्रतिनिधिलाई आग्रह गरेका छन् । 
३ नम्बर प्रदेशमा कांग्रेसबाट विजयी स्थानीय तहका प्रमुख एवं उपप्रमुखहरुसंग मंगलबार हेटौँडामा भएको अन्तरक्रियामा उनले जनताको मतबाट विजयी जनप्रतिनिधिले जनताको हितमा मात्रै ध्यान दिनुपर्नेमा जोड दिएका हुन् । संघीयता कार्यान्वयनका लागि ३ तहको निर्वाचन नेपाली कांग्रेस नेतृत्वमै सम्पन्न भएको भन्दै यसको पूर्ण कार्यान्वयनको प्रमुख जिम्मेवारी पनि कांग्रेसको नै भएको बताए । उनले जनतासंग नजिक रहेको सरकार स्थानीय तह भएकाले उनीहरुको हरेक समस्या समाधानमा स्थानीय तहका जनप्रतिनिधि लाग्नुपर्ने बताए । 
कार्यक्रममा सहभागी स्थानीय तहका प्रमुख एवं उपप्रमुखहरुले स्थानीय तहमा निर्वाचित भएको एक बर्षे कार्यकालमा कानूनी पक्षबारे सिक्दै जनताको काम गर्दै आएको बताए । उनीहरुले ३ तहको निर्वाचनमा प्राविधिक रुपमा हारेपनि कांग्रेसको नीतिले जितेको भन्दै स्थानीयस्तरमा जनताको सेवामा खटिने प्रतिवद्धता व्यक्त गरेका थिए । पार्टीले स्थानीय तहमा निर्वाचित जनप्रतिनिधिहरुसंग समन्वय गर्नु अत्यावश्यक रहेको बताएका थिए ।
कार्यक्रममा ललिपुर महानगरपालिकाका प्रमुख चिरिबाबु महर्जन, काठमाडौं महानगरपालिकाका उपप्रमुख हरिप्रभा खड्गी, भरतपुर महानगरपालिकाका उपप्रमुख पार्वती शाह, गाउँपालिका महासंघका महासचिव बंशराम तामाङ लगायतको सहभागिता रहेको थियो ।