संघीयता कार्यान्वयनका लागि तीन तहको समन्वय आवश्यक : पण्डित

८ जेठ, हेटौँडा । संघीय मामिला तथा सामान्य प्रशासनमन्त्री लालबाबु पण्डितले संघीय कार्यान्वयनका लागि तीनै तहको समन्वय आवश्यक रहेको बताएका छन् । हेटौँडामा भएको ३ नम्बर प्रदेश समन्वय परिषद बैठकमा मंगलबार बोल्दै मन्त्री पण्डितले तीन तहको समन्वयको विकल्प नभएको बताए । तीनवटै तहको आ–आफ्नो अधिकार भएपनि समन्वयको आधारमा अघि बढ्दा सफल हुनेतर्फ सबैको ध्यान जानु जरुरी रहेको बताए । 
संघीय र प्रदेश सरकार कानून निर्माणको क्रममा रहेको भन्दै कानूनले पनि तीन तहको सरकारलाई काम गर्न सहज बनाउने उनको भनाई छ । उहाँले कर्मचारीमा सकेसम्म तोकेको कार्यक्षेत्रमा जान नमान्ने प्रवृत्ति हावि रहेको भन्दै आफु रहुन्जेल यस्तो प्रवृत्ति नचल्ने बताउनुभयो । जनप्रतिनिधिको मर्यादाक्रमबारे पुर्नविचार भईरहेको मन्त्री पण्डितको भनाई छ । 
कार्यक्रममा ३ नम्बर प्रदेश मूख्यमन्त्री डोरमणी पौडेलले स्थानीय तहमा अहिले देखिएको समस्या समाधानका लागि प्रदेश सरकारले पहल गर्ने बताए । २ दिनसम्म चलेको प्रदेश परिषद बैठकमा ३ नम्बर प्रदेशका १ सय १९ स्थानीय तहका प्रमुख र उपप्रमुखले काम गर्न परेको समस्या अवगत गराउँदै समन्वयका लागि संघीय र प्रदेश सरकारको ध्यानाकर्षण गराएका थिए ।