प्रदेश सदस्यले सोधे–रात्रीभोजका लागि १० लाख किन ?

१६ असार, हेटौँडा । सुशासनलाई आफ्नो पहिलो प्राथमिकता भन्ने प्रदेश ३ को सरकारले रात्रिभोजका लागि १० लाख रुपैँया बजेट विनियोजन गरेपछि विरोध शुरु भएको छ । बजेट पारित भएपछिको रात्रिभोजका लागि १० लाख रुपैँया विनियोजन गरेपछि प्रदेशसभामा विरोध भएको हो । प्रदेशसभा बैठकमा शनिबार बोल्दै राप्रपा प्रजातान्त्रिककी प्रदेशसभा सदस्य रिना गुरुङले रात्री भोजका लागि छुट्याईएकोे भन्दै आपत्ति जनाईन् । बजेटमा मूख्यमन्त्री कार्यालयको कार्यक्रम खर्च अन्तरगत ‘प्रदेश सरकारको नीति कार्यक्रम पारित पछि गरिने रात्रिभोज कार्यक्रम’ शिर्षकमा १० लाख रुपैंया विनियोजन गरिएको छ । उनले यहि बजेटलाई फजुल खर्च भन्दै विरोध गरेकी हुन् । उनले जनतासंग सभासद शिर्षकमा छुट्याईएको ३९ लाख रुपैँयाको समेत विरोध गरिन् । संचारक्षेत्र र धार्मिक पर्यटनप्रति प्रदेश सरकार उदासिन देखिएको उनको भनाई थियो ।
बैठकमा बोल्दै नेकपाका प्रदेशसभा सदस्य पशुपति चौलगाईले बजेटले सहकारी क्षेत्रलाई समेट्न नसकेको बताए । उनले यसअघि नै डिपिआर भईसकेका योजनामा पुनः डिपिआरका लागि बजेट विनियोजन गरिएको भन्दै यसबारे ध्यान दिन सुझाव दिए । कांग्रेस प्रदेशसभा सदस्य गिता वाग्लेले द्ुई तिहाईको दम्भ बजेटमा देखिएको भन्दै आफुलाई मात्रै हेरेर नभई जनतालाई हेरेर बजेट बनाउन सरकारलाई सुझाव दिईन् । उनले त्रिवेणी–देवघाटधाम धार्मिक पर्यटन, सुकुम्बासी व्यवस्थापन, चितवनलाई मेडिकल शहर बनाउने जस्ता मुद्धा बजेटमा ओझेलमा परेको बताईन् । 
विवेकशिल साझा पार्टीका प्रदेशसभा सदस्य रमेश पौड्यालले बजेट समृद्धिको गहिराईतर्फ नगएको र कनिका छर्ने काम मात्रै भएको बताए । उनले औसत गैरसरकारी संस्थाले ल्याउने जस्तो गरी बजेट आएको भन्दै सुधारका लागि सुझाव दिए । उनले प्रदेश गौरवका योजना, संसद सचिवालय र विषयगत समितिलाई न्यून बजेट छुट्याएको भन्दै आलोचना गरे । बैठकमा प्रदेशसभा सदस्यहरु विशाल खड्का, नारायणबहादुर सिल्वाल, भीमसेन खत्रि लगायतले धारणा राखेका थिए ।