रात्रीभोजको बजेटबारे विरोध नगर्न मूख्यमन्त्रीको आग्रह

१९ असार, हेटौँडा । प्रदेश नम्बर ३ का मूख्यमन्त्री डोरमणी पौडेलले आगामी आर्थिक बर्षको बजेट पारित भएपछिको रात्रिभोजमा विनियोजन भएको बजेटको विरोध नगर्न आग्रह गरेका छन् । 
प्र्रदेशसभा बैठकमा मंगलबार विनियोजन विधेयकमाथिको छलफलका क्रममा उठेका प्रश्नहरुको जवाफ दिंदै उनले विरोध नगर्न आग्रह गरेका हुन् । उनले भने–‘हात जोडेर भन्छु रात्रीभोजको बजेटबारे विरोध नगर्नुस् ।’ बजेटमा मूख्यमन्त्री कार्यालयको कार्यक्रम खर्च अन्तरगत ‘प्रदेश सरकारको नीति कार्यक्रम पारित पछि गरिने रात्रिभोज कार्यक्रम’ शिर्षकमा १० लाख रुपैंया विनियोजन गरिएको छ । बजेट विनियोजनमाथि प्रदेशसभा सदस्यहरुले विरोध गरेका थिए । 
रात्रिभोजका लागि विनियोजन गरिएको १० लाख रुपैँयाको समर्थन गर्दै भौतिक पूर्वाधारमन्त्री केशव स्थापितले पनि बजेट पास भएको खुशीयालीमा अहिले छुट्याएको १० लाख अपुग भएको भन्दै थप १० लाख छुट्याउनुपर्ने बताएका थिए । उनले आफुले पनि धेरैसंग बजेट निर्माणका क्रममा सुझाव लिएको, कर्मचारीसमेत यसमा खटिएको भन्दै केही रमाईलो गर्नका लागि बजेट विनियोजन भएको बताए । ३५ अर्ब बजेटको अति नै न्यून बजेट रात्रि भोजमा राखेको भन्दै विरोध गर्नु नपर्ने बताए ।
प्रदेशसभा बैठकमा मूख्यमन्त्री पौडेलले विगतमा विस्तृत परियोजना प्र्रतिवेदन (डिपिआर) तयार भईसकेका योजनाबारे बजेट परेकोबारे सरकारलाई जानकारी नभएको भन्दै यसको जिम्मेवारी योजना दिनेले नै लिनुपर्ने बताएका थिए । उनले यसमा त्रुटी भएको स्विकार गर्दै आगामी दिनमा यस्तो हुन नदिन राष्ट्रिय योजना आयोगमार्फत योजना कार्यान्वयन गरिने बताए ।