आयोगको आदेश प्राधिकरणबाट वेवास्ता

१२ असोज, हेटौँडा । संवैधानिक निकाय राष्ट्रिय सूचना आयोगले दिएको आदेश नेपाल विद्युत प्राधिकरण क्षेत्रीय कार्यालय हेटौँडाले वेवास्ता गरेको छ । आयोगले सूचना दिनु भनि आदेश गरेपनि पत्रकार हरि हुमागाँईलाई सूचना नदिएर प्राधिकरणले आदेशको वेवास्ता गरेको हो । 
सूचना आयोगले पत्र दर्ता गरेको सातदिनभित्र सूचना दिन प्राधिकरणले आदेश दिएपनि आठौं दिनसम्म पनि प्राधिकरण क्षेत्रिय कार्यालय हेटौडाका प्रमुख ईन्जिनियर पद्माकान्त झा र सूचना अधिकारीले सूचना उपलब्ध नगराएको पत्रकार हुमागाईले प्रष्ट खबरलाई जानकारी दिए । आमभन्ज्याङ–३ निवासी हुमागाईले मागेको सूचना दिनु भनेर राष्ट्रिय सूचना आयोगका प्रमुख आयुक्त कृष्णहरि बाँस्कोटा, आयूक्तहरु किरण कुमार पोख्रेल र एशोदादेबी तिम्सिनाले आदेश दिएका थिए । 
आयोगले दिएको आदेश असोज ४ गते क्षेत्रिय कार्यालय हेटौडामा ५३३ नम्बरमा दर्ता भएपनि सूचना नदिएका झाले आयोगलाई नै सूचना दिएको भन्दै पन्छिएका छन् । तर आयोगका प्रमुख आयुक्त कृष्णहरि बाँस्कोटाले भने आफुहरुलाई प्राधिकरणले सूचना नदिएको र सूचना माग गर्ने व्यक्तिलाई नै उपलव्ध गराउनुपर्ने बताए । हुमागाईले आव ०७२÷०७३ मा क्षेत्रीय कार्यालय अन्तरगतका जिल्लाको फिडरै पिच्छे बितरण भएको विद्युत युनिट, खपत गरेको युनिट र चुहावट युनिट बारे जानकारी मागेका थिए । 
मौखिक सूचना माग्दा नदिएपछि उनले लिखित निवेदन दर्ता गराएका थिए । आयोगको आदेशको वेवास्ता भएको भन्दै हुमागाईले बुधबार आयोगमा प्राधिकरण क्षेत्रीय कार्यालयका प्रमुख झा र सूचना अधिकारीलाई कारवाही, सूचना नदिंदा भोग्नुपरेको कठिनाईको क्षतिपूर्ति र जरिवान गराउन निवेदन दर्ता गराईएको छ । 
आयोगले कारवाहीका लागि पत्र लेखेपनि मकवानपुरका प्रमुख जिल्ला अधिकारीलाई आयोगबाट पत्र लेखेर समेत सूचना उपलब्ध गराईने सूचना आयोगका उपसचिब बाबुराजा श्रेष्ठले बताए ।