६ मध्ये ३ विधेयक प्रदेशसभाबाट पारित

१ भदौं, हेटौँडा । प्रदेश नम्बर ३ को प्रदेशसभा बैठकमा शुक्रबार प्रस्तुत भएका ६ मध्ये 
३ विधेयक पारित भएको छ । शुक्रबार नै प्रस्तुत भएका ३ वटा विधेयकमाथि सैद्धान्तिक छलफल सकिएको छ ।
बैठकमा मूख्यमन्त्री डोरमणी पौडेलले पेश गरेको मूख्यमन्त्री तथा मन्त्रीको पारिश्रमिक तथा सेवा सुविधा सम्बन्धी विधेयक र आन्तरिक मामिला तथा कानून मन्त्री शालिकराम जम्कट्टेलले प्रस्तुत गरेको प्रदेशसभाका पदाधिकारी तथा सदस्यको पारिश्रमिक तथा सेवा सुविधा सम्बन्धमा व्यवस्था गर्न बनेको विधेयक सर्वसम्मत पारित भएको छ । त्यसैगरी मूख्यमन्त्री डोरमणी पौडेलले पेश गरेको प्रदेश प्रशासनिक कार्यविधि (नियमित गर्ने) सम्बन्धमा व्यवस्था गर्न बनेको विधेयक पनि सर्वसम्मत पारित भएको छ । यी विधेयकहरु प्रदेश मामिला समितिमा दफावार छलफल भई प्रदेशसभा बैठक प्रस्तुत भएका थिए । 
बैठकमा सामाजिक विकास मन्त्री युवराज दुलालले प्रदेश स्वास्थ्य सेवा सम्बन्धमा व्यवस्था गर्न बनेको विधेयक र आन्तरिक मामिला तथा कानून मन्त्री शालिकराम जम्कट्टेलले प्रदेश संस्था दर्ता सम्बन्धी कानूनी व्यवस्था गर्न बनेको विधेयक र विपद व्यवस्थापन कोषसम्बन्धी विधेयक प्रस्तुत गरेका थिए । तीनवटै विधेयकमाथिको सैद्धान्तिक छलफल सकिएको छ । फाष्ट ट्रयाकबाट विधेयक प्रदेशसभा बैठकमा ल्याउनका लागि शुक्रबारको बैठकमा प्रदेशसभा नियमावलीका केही दफा र उपदफा निलम्बन समेत गरिएको थियो । प्रदेशसभाको बैठक अनिश्चितकालका लागि स्थगित भएको छ ।