मूख्यमन्त्री पौडेलको दैनिक कार्यतालिका तय

६ भदौ, हेटौँडा । प्रदेश नम्बर ३ का मूख्यमन्त्री डोरमणी पौडेलको दैनिक गर्ने कामको कार्यतालिका तय भएको छ । मूख्यमन्त्रीको सचिवालयले बुधबार कार्यतालिका तय भएको जानकारी दिएको हो । 
मूख्यमन्त्री पौडेलले अब हरेक दिन विहान ८ बजेदेखि ९ः३० सम्म पार्टी नेता तथा कार्यकर्तासंग भेटघाट गर्ने छन् । कार्यालय दिनमा विहान ११ः३० देखि १ः३० बजेसम्म मूख्यमन्त्री तथा मन्त्रीपरिषद कार्यालय र मन्त्रालयहरुको नीतिगत तथा आन्तरिक कार्यक्रम गर्ने कार्यतालिका छ । आइतबार, सोमबार, बुधबार र विहिबार दिउँसो १ः३० देखि २ः४५ बजेसम्म विभिन्न माग लिएर आउने व्यक्ति, संस्था र निकायका प्रतिनिधिसंग भेटघाट तथा छलफल गर्ने, मंगलबार र शुक्रबार विभिन्न विषयका विज्ञ समूहसंग छलफल गरिने मूख्यमन्त्रीको सचिवालयले जनाएको छ ।
मूख्यमन्त्री पौडेलले सोमबार, मंगलबार र बुधबार दिउँसो ३ बजेदेखि ४ः३० बजेसम्म प्रदेशसभा सदस्यहरुसंग, विहिबार विदेशी निकायका प्रतिनिधिसंग, आइतबार स्थानीय तहका प्रतिनिधि र शुक्रबार सञ्चारकर्मीहरुसंग भेटघाट गर्ने  भेटघाट गर्ने छन् । अपरान्ह ५ः३० देखि ७ बजेसम्म राजनीतिक व्यक्ति तथा पदाधिकारीसंग भेटघाटको कार्यतालिका तय भएको मूख्यमन्त्रीको सचिवालयले जनाएको छ । 
दैनिक कार्यलाई प्रभावकारी बनाउन र भेटघाटलाई व्यवस्थित गर्न कार्यतालिका तय गरेको मूख्यमन्त्रीका नीजि सचिव बद्रीबहादुर पाठकले जानकारी दिए ।