मेसी फर्केको खेलमा बार्सिलोना पराजित

२६ कार्तिक, हेटौँडा । चोटका कारण तीन साता मैदानबाहिर रहेका कप्तान लिओनेल मेसीले पुनरागमन गरेको खेलमा बार्सिलोना रियल बेटिससँग पराजित भएको छ । स्पेनिस ला लिगा अन्तर्गत आइतबारको खेलमा रियल बेटिसले बार्सिलो.नालाई ४–३ को गोल अन्तरले हराएको छ ।
बार्सिलोनाको घरेलुमैदानमा भएको खेलमा बेटिसका लागि जुनियर फिर्पोले २० औं मिनेटमा गोल गर्दै अग्रता दिलाएका थिए । त्यसको १४ मिनेटपछि जोआकिनले बेटिसको अग्रता दोब्बर पारे । पहिलो हाफमा २–० ले पछाडी परेको बार्सिलोनाले केहि अवसर सिर्जना गरेपनि गोल अन्तर कम गर्न भने सकेन । 
६८ औं मिनेटमा लिओनेल मेसीले पेनाल्टीमा गोल गर्दै गोलअन्तर घटाए । तर त्यसको तीन मिनेटमा नै बेटिसले पुनः गोल गर्दै २ गोलको अग्रता बनायो । बेटिसका लागी जिओभानी लो सेल्सोले गोल गर्दै बेटिसलाई ३–१ को अन्तरमा ल्याए ।
यस्तै वैकल्पिक खेलाडीका रुपमा मैदान छिरेका बार्सिलोनाका भिडालले ७९ औं मिनेटमा गोल गर्दै पुनरागमनको आशा जगाए । तर इभान राकीटिच ८ मिनेट समय बाँकी रहँदा दोहोरो पहेंलो कार्ड खाँदै मैदान छाड्न बाध्य भएपछि बार्सिलोना खेलमा फर्कने सम्भावना कम भयो । 
८३ औं मिनेटमा सर्जियो कानालेसले बेटिसका लागी गोल गरेपछि बार्सिलोना २ गोलले पछाडी प¥यो । इन्ज्युरी समयमा लिओनेल मेसीले पुनः गोल फर्काउँदै थोरै आशा जगाएपनि अंक खोस्न भने सकेनन् । 
यस हारसँगै लिग तालिकाको शीर्ष स्थानमा बार्सिलोनाको अग्रता १ अंकमा झरेको छ । बार्सिलोनाको १२ खेलमा २४ अंक छ भने एटलेटिको म्याड्रिड र अलाभेसको २३ अंक छ । ११ खेल खेलेको एस्पान्योलको २१ अंक छ र जित दर्ता गरेमा बार्सिलोनासँग अंक बराबरी गर्ने अवसर छ ।