सहिद स्मारक ‘ए’ डिभिजन लिगः मनाङ र आर्मी विजयी

१ मंसिर, हेटौँडा । सहिद स्मारक ‘ए’ डिभिजन लिग फुटबल प्रतियोगिताअन्तर्गत् शनिबार भएका दुई खेलमा मनाङ–मर्स्याङ्दी र आर्मी विजयी भएका छन् । हल्चोकस्थित सशस्त्र प्रहरीको खेलमैदानमा सम्पन्न पहिलो खेलमा मनाङले न्यूरोड टिम (एनआरटी) क्लबलाई २–० गोल अन्तरले हराएको छ ।
यस्तै शनिवार नै भएको दोश्रो खेलमा आर्मीले च्यासल युवा क्लबलाई १–० गोलले हरायो । 
शनिवार भएको मनाङ र एनआरटी विचको पहिलो खेलमा खेलको १७औं मिनेटमा अन्जन विष्टको पेनाल्टी गोलमार्फत् मनाङले अग्रता लिएको थियो । अन्जनलाई एनआरटीका खेलाडीले डी बक्सभित्र लडाएपछि मनाङले पेनाल्टी पाएको थियो । 
खेलको ३९औं मिनेटमा एनआरटीको डिफेन्स लाइनलाई बिट गर्दै अफ्रिकन खेलाडी ओलाव अफिजले मनाङको अग्रतालाई दोब्बर बनाएका थिए । पहिलो हाफमा २–० को अग्रता बनाएको मनाङले दोस्रो हाफमा पनि गोल गर्ने धेरै अवसर गुमाएको थियो । 
एनआरटीले भने पहिलो हाफको तुलनामा दोस्रो हाफमा सुधारिएको प्रदर्शन गरे पनि गोल गर्न सकेन । खेलमा मनाङका अन्जनले ‘म्यान अफ दी म्याच’ घोषित हुँदै रु १० हजार प्राप्त गरे । 
जितसँगै मनाङ दुई खेलबाट ६ अंक जोड्दै अंकतालिकाको शीर्ष स्थानमा छ । समान खेलबाट एनआरटीको १ अंक छ । यसअघि मनाङले पहिलो खेलमा ब्रिगेड ब्वाइजलाई ३–१ ले हराएको थियो ।
एनआरटीले पहिलो खेलमा त्रिभुवन आर्मी क्लबसँग २–२ गोलको बराबरी खेलेको थियो ।
यसैविच शनिवारनै भएको दोश्रो खेलमा च्यासल युवा क्लबलाई आर्मीले १–० गोल अन्तरले हराएको छ । आर्मीको जितका लागी डिफेन्डर विकास खवासले गोल गरेका हुन् । 
उनले सन्तोष तामाङको कर्नरमा २७ औं मिनेटमा हेडरमार्फत गोल गरेका थिए ।
जितसँगै आर्मीले लिगमा पहिलो जित दर्ता गरेको छ । आर्मीको २ खेलमा ४ अंक छ भने च्यासलको २ खेलमा १ अंक छ ।