सामाजिक सुरक्षा कोष दुरुपयोग हुन दिईदैन : ओली

११ मंसिर, काठमाडौं । प्रधानमन्त्री केपी शर्मा ओलीले सामाजिक सुरक्षा कोषको दुरुपयोग हुन नदिने दावि गरेका छन् । उनले कोष दुरुपयोग हुन्छ कि भन्ने आशंका नगर्न आग्रह गरेका हुन् ।

योगदानमा आधारित सामाजिक सुरक्षा योजना घोषणा गर्दै प्रधानमन्त्री ओलीले कोष सदुपयोगको  ठोस नीति तयार रहेको भन्दै दुरुपयोगको कुनै गुञ्जायस नभएको दावि गरे । योजनाले श्रमिकहरुको हितमा काम गर्ने भन्दै उहाँले यसलाई व्यवस्थित ढंगबाट संचालन गर्नुपर्नेमा जोड दिए । कार्यक्रममा रोजगारदाताका प्रतिनिधिहरुले कोषको दुरुपयोग हुनसक्ने आशंका गरेका थिए । योजनाअनुसार सूचिकृत रोजगारदाता कम्पनीले सबै श्रमिकको आधारभूत परिश्रमिकबाट ११ प्रतिशत र कम्पनीका तर्फबाट २० प्रतिशत गरी ३१ प्रतिशत रकम सरकारले सञ्चालन गरेको सामाजिक सुरक्षा कोषमा जम्मा गरिनेछ। मन्त्रालयले गत कार्तिक २७ गते राजपत्रमा सूचना प्रकाशित गरी योजनामा सूचिकृत हुन सबै रोजगारदाता कम्पनीलाई समयसीमा दिएको छ।

योजनामा समावेश भएका श्रमिकले सामाजिक सुरक्षा कोषबाट ४ प्रकारका सुविधा पाउने व्यवस्था गरिएको छ। सो व्यवस्थाअनुसार श्रमिकले औषधि उपचार स्वास्थ्य तथा मातृत्व सुरक्षा, दुर्घटना तथा अशक्तता सुरक्षा, आश्रित परिवार सुरक्षा र वृद्ध अवस्था सुरक्षा योजना सञ्चालन गरिएको छ।