हाँडिखोलामा एम्बुलेन्स खरिदका लागि सहयोग जुट्दै

५ कार्तिक, हेटौंडा । मकवानपुरको हाँडीखोला गाविसमा एम्बुलेन्स खरिदका लागि सहयोग रकम जुटिरहेको जनाईएको छ । रोजगारीको सिलसिलामा प्रवासमा रहेका युवाहरुले हाँडीखोला प्रवासी समुह गठन गरेर एम्बुलेन्स खरिदका लागी हालसम्म ७ लाख रुपैंया संकलन गरेका हुन् ।

हाँडीखोला स्वास्थ्य चौकिलाई हस्तान्तरण गर्नेे लक्ष्यका साथ एम्बुलेन्स खरिद अभियानमा कोरियामा रहेका हाँडीखोलाको युवाहरु आर्थिक सहयोग गरेको हाँडीखोला प्रवासी समुहका अभियान्ता संजिव पाठकले जानकारी दिए । गाविसमा एम्बुलेन्स नहुँदा धेरैं बिरामीले अकालमा ज्यान गुमाउनु परेकोले एम्बुलेन्स खरिद गर्ने अभियान शुरु गरिएको पाठकले बताए ।

अचानक दुर्घटना परे वा गम्भिर बिरामी परे हेटौंडाबाट एम्बुलेन्स पुगेर बिरामी अस्पताल लैंजानु पर्ने बाध्यताको अन्त्यका लागि एम्बुलेन्स खरिद अभियान थालिएको हो । बेलायत निबासी चिरञ्जीवी ढकालले संयोजन गरेको अभियानमा विभिन्न देशमा युवाहरूको सहयोग जुटिरहेको छ ।

पहिलो चरणमा नेपालमा रहेको हिमालयन बैंक खाता नं ०११०६०६०२५००१८ ज्योतिराज लुइँटेल, अनन्त प्रकाश अर्याल र अर्जुन पुडासैनिको संयुक्त खातामा कोरियाबाट १० जना युवाले १ एक लाख १४ हजार ८ सय रूपैयाँ जम्मा गरि अभियानको शुभारम्भ गरेका छन् । हाडीखोला प्रबासी समुहले यस अघि हाडीखोला स्वास्थ चौकीलाई ८ लाख रुपैंया बराबरको भिडियो एक्सरे मेसिन पहिलो कोसेली स्वरुप हस्तान्तरण गरि सकेको छ ।

प्रवासी समूहमा जापानबाट श्रीराम रिजाल र धिरज पौडेल, अमेरिकाबाट बुद्धिमान वाइवा, अस्ट्रेलियाबाट राजकुमार अधिकारी, साउदी अरबबाट सुदर्शन अधिकारी र अखिल पुडासैनी, कतारबाट प्रकाश सापकोटा, दुबईबाट केशव पाठक र नारायण प्रसाद पौडेल लगायतले सहयोग जुटाईरहेका छन् ।