इन्टरनेट अध्यक्षद्वारा ४ जनालाई छात्रबृत्ति

१ मंसिर,  हेटौंडा । मकवानपुरको चर्चित फुटबल क्लब एफसी इन्टरनेटका अध्यक्ष तथा मकवानपुर जिल्ला फुटबल संघका प्रथम उपाध्यक्ष मणिष श्रेष्ठले विपन्न तथा जेहेन्दार चार विद्यार्थीलाई छात्रबृत्ति प्रदान गर्ने भएका छन् ।

श्रेष्ठले हेटौंडा–२२, हटियास्थित बालबोध उच्च माविमा अध्ययनरत तीनजना  तथा हेटौंडाको सिटी कलेजमा अध्ययनरत एकजना विद्यार्थीका लागि एकवर्ष बराबरको कलेजमा लाग्ने सम्पूर्ण शुल्क रकम उपलब्ध गराउने प्रतिबद्धता जनाएका हुन् ।

बालबोधमा अध्ययनरत् बिष्णुमाया श्रेष्ठ, मीना तिमल्सिना र प्रतिमा सुवेदीलाई एकमुष्ट २५ हजार तीनसय ५० तथा सिटी कलेजमा अध्ययनरत शेलेष ढकाललाई एकवर्षको मासिक शुल्कबापतको १२ हजार रूपैयाँ गरी ३६ हजार तीनसय ५० रुपियाँ छात्रबृत्ति बापत प्रदान गर्न लागेको उनले बताए ।

उनले विद्यालय तथा कलेजको बार्षिक अभिभावक भेलाको समयमा रकम विद्यालयका शिक्षक तथा अभिभावकको बीचमा प्रदान गर्ने तयारी गरेका छन् । ‘पैसाकै अभावमा पढाई रोकिन्न हुन्न भन्ने मान्यताका साथ मैले सानो सहयोग गर्न लागेको हुँ । आगामी दिनमा पनि मेरोतर्फबाट सहयोग जारी रहनेछ’, उनले भने ।

उनका अनुसार खेलक्षेत्रमा लामो समयदेखि योगदान पुर्याउँदै आएपनि  शैक्षिक क्षेत्रमा भने पहिलो पटक सहयोग उपलब्ध गराउन लागिएको हो । ‘अब खेलसँगै शिक्षालाई पनि अगाडि बढाइनेछ’, उनले भने ।