आजबाट एसईइ , मकवानपुरमा ५ हजार ९ सय ७७ परीक्षार्थी सहभागी हुने

१० चैत, हेटौंडा।आईतवार बाट सुरुहुने माध्यमिक शिक्षा परीक्षा अर्थात् एसइई परीक्षाको सम्पूर्ण तयारी पूरा भएको छ ।

आइतबार(आज) बिहान ८ बजेबाट शुरु हुने परीक्षामा सबै तयारी पूरा भएको परीक्षा नियन्त्रण कार्यालय सानोठिमीले जानकारी दिएको छ ।

परीक्षा नियन्त्रक विष्णु अधिकारीका अनुसार यस वर्षको एसइई परीक्षामा देशभरबाट कूल ४ लाख ७५ हजार तीन परीक्षार्थी परीक्षामा सहभागी हुने भएका छन् । यस वर्षदेखि पहिलोपटक सङ्घीय संरचनाको स्वरुपअनुसार भोलिबाट शुरु भई आगामी २१ गतेसम्म सञ्चालन हुने परीक्षामा नियमित, ग्रेडवृद्धि र प्राविधिक धारका परीक्षार्थी सहभागी हुनेछन् ।

परीक्षार्थीमध्ये दुई लाख ३६ हजार ४४५ छात्र र दुई लाख ३८ हजार ५५८ छात्रा रहेका छन् । परीक्षा नियन्त्रक अधिकारीले परीक्षामा सबैभन्दा बढी प्रदेश नं ३ बाट एक लाख ६०२ परीक्षार्थी सहभागी हँुदैछन् । त्यसैगरी सबैभन्दा कम कर्णाली प्रदेशबाट ३५ हजार ६२४ परीक्षार्थी सहभागी हुँदैछन् ।

त्यस्तै प्रदेश नं १ बाट ८३ हजार ८१८, प्रदेश नं २ बाट ७० हजार ५१८, गण्डकी प्रदेशबाट ४८ हजार ६३, प्रदेश नं ५ बाट ७६ हजार ९८३ र सुदूरपश्चिम प्रदेशबाट ५३ हजार ९७२ परीक्षार्थी सामेल हुनेछन् । परीक्षामा देशभर एक हजार ९६९ परीक्षा केन्द्र निर्धारण गरिएको छ भने एक हजार ९६९ केन्द्राध्यक्ष, तीन हजार १६७ सहकेन्द्राध्यक्ष र २९ हजार ५३५ सुरक्षाकर्मी परिचालित हुनेछन् परीक्षामा मकवानपुरबाट ५ हजार ९ सय ७७ जना विद्यार्थी सहभागी हुने भएका छन् ।

त्यसैगरी जिल्ला शिक्षा विकास तथा समन्वय इकाइ हेटौंडाले जनाए अनुसार  मकवानपुरको हेटौंडा उपमहानगरपालिका, थाहा नगरपालिका र ८ गाउँपालिकामा २४ वटा परीक्षा केन्द्र निर्धारण गरिएको छ । 

जसमा ५ हजार ९ सय ७७ जना विद्यार्थी  सहभागी हुने त्यस मध्ये एक सय ४८ जना प्राविधिक तर्फका र ६७ जना विद्यार्थीले ग्रेड वृद्धिका लागि परीक्षा दिने जनाइएको छ । २४ वटा केन्द्रका लागि २४ केन्द्राध्यक्ष खटाइने कार्यालयकी परीक्षा शाखा प्रमुख सीता अर्यालले जानकारी दिइन् ।

परीक्षालाई व्यवस्थित र मर्यादित बनाउनका लागि आफूहरुले प्रहरीसँग समन्वय गर्ने इकाइ प्रमुख कृष्ण प्रसाद घिमिरेले बताए ।  परीक्षा बिहान ८ बजेदेखि ११ बजेसम्म हुनेछ ।